Аналитика
Главниот финансиски надзорник и главен ревизор на градот Њујорк, Марк Левин, јавно ја повика Anthropic да го одложи планираното излегување на берза во САД, оценувајќи дека компанијата за вештачка интелигенција прво треба да одговори на сериозните прашања поврзани со безбедноста на системите, корпоративното управување и брзината со која напредува технологијата.
Во писмо упатено до извршниот директор на Anthropic, Дарио Амодеи, Левин предупредува дека компанијата не треба да брза кон иницијална јавна понуда пред да покаже дека има доволно силни механизми за контрола на ризиците. „Наместо да брза со IPO, компанијата треба да ги фокусира своите напори на справување со овие досега невидени ризици“, наведува Левин.
Повикот има дополнителна тежина бидејќи контролорот на Њујорк има улога во управувањето со градските јавни пензиски фондови и надзорот на јавните финансии. Според информациите наведени во писмото, пензиските фондови на градот веќе имаат изложеност кон Anthropic, па прашањето за управувањето со компанијата не е само тема за технолошкиот сектор, туку и за заштитата на јавниот капитал.
ЗАГРИЖЕНОСТ ЗА БЕЗБЕДНОСТА НА ВИ-СИСТЕМИТЕ
Најголемите резерви на Левин се однесуваат на три области: безбедноста на напредните AI-системи, структурата на корпоративното управување и ризикот технолошкиот развој да се движи побрзо од регулативата и механизмите за контрола.
Во последниот период токму Anthropic објавуваше истражувања во кои се тестира однесувањето на поавтономни AI-модели во контролирани услови. Во дел од тие тестови биле забележани потенцијално проблематични способности, меѓу кои саботирање код, манипулирање со информации и можност за олеснување измами.
Таквите резултати дополнително го отвораат прашањето како компанијата ќе го балансира брзиот комерцијален раст со сопствените безбедносни стандарди.
АНТРОПИК СЕ ПОДГОТВУВА ЗА ИЗЛЕГУВАЊЕ НА БЕРЗА
Истовремено, Anthropic се подготвува за потенцијално едно од најголемите IPO-а во технолошкиот сектор.
Според пазарните информации наведени во текстот, компанијата би можела да излезе на берза уште во ноември, со целна проценка поголема од 2 трилиони долари. Ако таквата вредност се реализира, котирањето би се вброило меѓу најголемите во историјата на јавните пазари.
Паралелно, компанијата покажува силен раст. Приходите во третиот квартал, според истите информации, пораснале за 45% во однос на претходниот квартал, на 16,8 милијарди долари.
Токму комбинацијата од висок раст и сè поголеми безбедносни и управувачки ризици ја става Anthropic под дополнителен притисок пред потенцијалното излегување на берза.
НЕ СЕ ВАЖНИ САМО ПРИХОДИТЕ
Интервенцијата на Левин покажува и поширок тренд на пазарите на капитал.
Како што AI-компаниите растат и се приближуваат до јавните пазари, институционалните инвеститори сè повеќе ги анализираат не само приходите и потенцијалниот принос, туку и безбедноста на технологијата, корпоративното управување и усогласеноста со регулативите.
За пензиските фондови и другите долгорочни инвеститори, високата проценка на една AI-компанија носи и специфичен ризик: нејзината вредност може силно да зависи од технологија што се развива побрзо од регулативата и од способноста на самата компанија да ги контролира последиците од тој развој.
Anthropic засега јавно не одговорила на повикот на Левин, ниту има потврда дека барањето ќе влијае врз планираниот термин за IPO.
(Фото: Дарио Амодеи, TechCrunch)
