Аналитика
Акционерите на најголемата и најуспешна домашна банка ќе поделат дивиденда од 2.848.833.750 денари или 46,3 милиони евра. Износот ќе се пресметува по 1.250 денари за обична акција, што претставува 125 проценти од номиналната вредност. Исплатата ќе стартува на седми мај. Овие и други одлуки се усвоени на денешното Собрание на акционерите на Комерцијална банка.
„Акционерите потврдија дека Банката ја заврши 2024 година со бруто-добивка во износ од 5.482,1 милиони денари. По пресметување на данокот на добивка од 557,3 милиони денари, нето-добивката на Банката изнесува 4.924,8 милиони денари. Акционерите на Банката донесоа Одлука за употреба и распоредување на нераспределената добивка во износ од 4.924,8 милиони денари и ја утврдија дивидендата за обичните акции во висина од 125% од номиналната вредност на акцијата, односно по 1.250 денари на една акција. Исплатата на дивиденда ќе започне на 07.05.2025 година“, наведено е во ценовно чувствителната информација споделена преку Македонска берза.
За резервите на Банката се издвоени над 31 милион евра, а за реинвестирана добивка 2,6 милиони евра.
„Заради зголемување на вкупниот капитал на Банката и на книговодствената вредност на акциите на Банката, акционерите одлучија дел од добивката во износ од 1.915,5 милиони денари да се издвои во резерви. Дел од добивката во износ до 160 милиони денари се распределува во задржана добивка за инвестициски вложувања во 2025 година, која исто така го зголемува вкупниот капитал на Банката“.
Исто така, се посочува дека од страна на Собранието се усвоени финансиските извештаи и консолидираните финансиски извештаи, годишната сметка на консолидираната годишна сметка, како и годишниот извештај за работењето на Комерцијална банка во 2024 година.
