Аналитика
Акциите на Nvidia изгубија 4,27 проценти од вредноста во понеделникот, со што пазарната капитализација на американскиот технолошки гигант се намали за приближно 192 милијарди долари во само еден берзански ден. Скандалот која ја поврза вонбрачната љубовна афера на извршниот директор Џенсен Хуанг со истрагата за можно кинеско разузнавачко влијание ја погодија компанијата во момент кога Волстрит силно закрепнуваше. Додека Nasdaq порасна за 2,74 проценти, а конкурентот AMD за дури 13,3 проценти, Nvidia беше единствената компанија со пад во индексот на водечките производители на полупроводници.
Американските берзи го завршија тргувањето на 9 ноември со силен раст, но за Nvidia денот донесе нов удар врз довербата на инвеститорите. Акцијата на компанијата затвори на 178,67 долари, наспроти 186,64 долари во петокот, што претставува дневно намалување од 7,97 долари, односно 4,27 проценти.
При приближно 24,1 милијарди акции во оптек, ова значи дека пазарната вредност на Nvidia се намалила за околу 192,1 милијарда долари. Тоа е намалување на берзанската капитализација, а не загуба на готовина од работењето на компанијата.
Во текот на денот акцијата се спушти дури до 170,24 долари, по што делумно закрепна. Тргувањето беше исклучително интензивно: беа истргувани околу 455 милиони акции, повеќе од два и пол пати над обемот од претходната берзанска сесија.
Но, највпечатливиот податок не е само големината на падот, туку фактот дека тој се случи во ден на силно берзанско закрепнување. Индексот Dow Jones порасна за 2,15 проценти, S&P 500 за 2,35 проценти, а Nasdaq Composite за 2,74 проценти.
Уште поголем беше растот кај производителите на полупроводници. Индексот Philadelphia Semiconductor скокна за 6,9 проценти, поттикнат од добивките на Broadcom од 8,8 проценти и AMD од 13,3 проценти.
Nvidia беше единствената компанија во овој индекс што го заврши денот со пад.
Таквото раздвојување на пазарните движења укажува дека инвеститорите не ја напуштаат целата индустрија за вештачка интелигенција, туку реагираат на специфичната неизвесност околу Nvidia.
Непосредниот повод е независната истрага што ја започна управниот одбор по медиумските информации дека основачот и извршен директор Џенсен Хуанг можеби бил цел на кинеска разузнавачка операција. Хуанг претходно призна вонбрачна врска, по што беше најавена истрага за неговите контакти со жена за која американските разузнавачки служби се сомневаат дека работела за Кина.
Алис Хуанг, кинеска деловна жена обвинета од американските разузнавачки служби дека работи за Пекинг, се најде во центарот на голема контроверзија поврзана со извршниот директор на „Нвидиа“ (Nvidia), Џенсен Хуанг. Според извештај на „Њујорк тајмс“ (The New York Times), кинеското Министерство за државна безбедност ја регрутирало Алис Хуанг за да прибира разузнавачки информации за првиот човек на компанијата за производство на чипови, како и за евентуално влијание врз одлуките на компанијата во врска со продажбата на напредни чипови за вештачка интелигенција (ВИ) во Кина.
Засега нема јавно потврден доказ дека првиот човек на технолошкиот гигант Нвидиа свесно соработувал со странска разузнавачка служба или предал деловни тајни.
Сепак, неговата централна улога во компанијата го претвора скандалот во сериозно прашање за корпоративното управување. Аналитичарите предупредуваат дека евентуалното повлекување на Хуанг би можело да создаде значителна неизвесност околу стратегијата, односите со клиентите и идното позиционирање на Nvidia на глобалниот пазар.
Затоа, додека Волстрит во понеделникот ја враќаше довербата во технолошкиот сектор, Nvidia се соочи со поинаква пресметка: колку вреди најмоќната компанија во светот на вештачката интелигенција кога инвеститорите почнуваат да ја преиспитуваат стабилноста на нејзиното раководство?
(Фото: Алис и Џенсен Хуанг, Times of India)
