Аналитика
Цените на суровата нафта дополнително паднаа, а акциите на енергетските компании исто така забележаа пад по резултатите од среднорочните избори во САД, додека пазарите се подготвуваат за потенцијално радикална промена во американските политики.
Во моментот на пишување на овој текст, нафтата од типот „Брент“ се тргуваше по цена од 94,30 долари за барел, откако во средата забележа пад од 9%, додека нафтата од типот „Вест Тексас Интермидиет“ (WTI) се тргуваше по 87,35 долари за барел, по пад од 8% во средата – сето тоа по обезбедувањето мнозинство за Демократите во двата дома на Конгресот.
Енергетскиот индекс S&P во моментот на пишување бележеше пад од 4,77%, достигнувајќи 976,18 поени, поради очекувањата за промена во надворешната, но и во енергетската политика на САД. Овие очекувања се поттикнати од убедливите победи на демократските кандидати во Тексас и Џорџија, кои во своите изборни програми се спротивставија на изградбата на нови центри за податоци. Токму центрите за податоци беа во фокусот на проекциите за побарувачката на природен гас, како на краток, така и на долг рок.
Трамп сега се соочува со многу потежок политички пејзаж дома, откако демократите ја презедоа контролата врз Конгресот. Војната веќе го погоди просечниот Американец преку повисоките цени на енергенсите, а изборните резултати сугерираат дека на гласачите им е доста. Оттука, идејата е дека ова можеби конечно ќе му даде на Вашингтон посилен поттик да се насочи кон дипломатија, наместо кон понатамошна ескалација.
Иако ограничувањето на изградбата на нови центри за податоци можеби е релативно лесно, ставањето крај на војната со Иран би можело да биде многу посложено. Како што сугерираат најновите движења кај цените на нафтата и акциите на енергетските компании, очекувањата се големи; сепак, некои аналитичари предупредуваат дека изборните резултати всушност би можеле да го наведат претседателот Трамп кон ескалација, наместо кон деескалација. Ваквиот развој на настаните дополнително би ја влошил енергетската безбедност на глобално ниво.
„Доколку Техеран сфати дека на Трамп му е потребен договор – но не каков било договор – би можела да се појави реална можност за ставање крај на војната. Но, ако резултатите ги протолкуваат како доказ дека американската одлучност е ослабена, тоа би можело, напротив, да го охрабри Трамп да започне нова воена ескалација“, изјави Ебтесам ал-Кетби, претседател на Центарот за политики на Емиратите (Emirates Policy Center) со седиште во Абу Даби, пренесува Ројтерс.
Во извештајот, повикувајќи се на неименувани ирански претставници, се наведува дека Техеран „останува во состојба на висока готовност“, очекувајќи ескалација од страна на Трамп како обид да го надомести изборниот пораз.
(Фото: веб-страница на IEEFA)
