ПРЕСВРТ НА ГЛОБАЛНИТЕ ПАЗАРИ: Нафтата падна на 96 долари за барел

Цените на суровата нафта забележаа значителен пад во средата и останаа на ниско ниво и денес, откако претходно во септември имаа солиден раст. Падот уследи по извештаите на JP Morgan, Goldman и Kpler, кои укажуваат на тоа дека протокот на нафта од Персискиот Залив речиси се вратил на нивоата од пред војната.

Во моментот на пишување на текстот, суровата нафта од типот „Брент“ се тргуваше по цена од 97,36 долари што претставува пад од над 103 долари за барел претходниот ден, додека нафтата „Вест Тексас Интермидиет“ (WTI) се тргуваше по 89,57 долари за барел – пад од над 90 долари.

Претходно во текот на неделата, „Кплер“ објави податоци за извоз на нафта преку Ормуз кои достигнуваат речиси 80% од нивоата пред војната, додека „Џеј-Пи Морган“ процени дека извозот преку оваа клучна точка изнесува дури 98% од предвоените нивоа. „Голдман“ излезе со уште повисоки бројки, тврдејќи дека протокот на нафта од Блискиот Исток изнесува 23,3 милиони барели дневно, што е стапка еднаква на просекот предвиден за 2025 година.

Покрај тоа, според банката, Саудиска Арабија всушност извезувала повеќе нафта во септември оваа година отколку во септември минатата година. „Забележуваме разлика помеѓу падот на иранскиот извоз и растот на извозот од другите производители во Персискиот Залив“, изјавија аналитичарите за суровини на Голдман, цитирани од Блумберг. „Проценетиот извоз на Саудиска Арабија повеќе од двојно се зголеми во септември и го надмина просекот предвиден за 2025 година.“

Во меѓувреме, извештаите за ирански напади врз танкери во Ормускиот Теснец – кои не беа пренесени од големите мејнстрим медиуми, но беа објавени од специјализирани медиуми за поморски транспорт и осигурување, вклучително и „Лојдс лист“ (Lloyd’s List) – немаа никакво влијание врз цените. За нападите првично извести службата „UK Maritime Trade Operations“, која редовно објавува информации за инциденти во областа на Ормуз.

Податоците сугерираат дека иако протокот на нафта од Персискиот Залив можеби се подобрува благодарение на претоварувањето од брод на брод и алтернативните рути, регионот сè уште не може да се смета за безбеден, а тоа влијае на трошоците за транспортот на нафтата што се извезува во поголеми количини од претходно.