Аналитика
Депозитите се на ниво од 2,2 милијарди евра, од камати се инкасирани речиси 90 милиони евра, а нето добивката е 35 милиони евра
Парите растат на дрвото на упорноста. Комерцијална банка нема допирни точки со Јапонија, од каде што, патем, потекнува поговорката, но ја има истрајноста. Ни пандемијата, ни инфлацијата, ни домашно продуцираните и од надвор увезените шокови не ја намалија плодноста на дрвото, кое „разлиста“ со профит од 34,9 милиони евра.
Незгодите и непогодите што беа присутни во текот на минатата година, кога и е остварен овој деловен потфат, не успеале да им наштетат на корените. Каматите, провизиите, надоместите и курсните разлики резултираат со вкупни приходи од 89,7 милиони евра. Тука особено се значајни каматите, со нето приход од 50,3 милиони евра, што е за 26,1 насто натфрлување во споредба со 2021 година. Од провизии и надоместоци, пак, инкасирани се 17,3 милиони евра. Курсните разлики, кои за 70,4 проценти ја „шијат“ 2021 година, и донеле на Банката нето приходи од 5,4 милиони евра.
Со други зборови, плодородноста на дрвото е пред се во кредитирањето како активност со добар залет и кон фирмите и кон граѓаните, а потпомогнато со зголемените каматни стапки на благајничките записи и на депозитите пласирани во НБРСМ, со пласманите кои се движат по нагорна линија, исто како и вложувањето во државни хартии од вредност. Во прилог оди и зголемениот промет на девизниот пазар и обемот на работа кој постојано се шири.
Кредитирањето, односно растот во тој сегмент, како и повисокото ниво на претпазливост во проценката на кредитниот ризик, условиле нето-исправката на вредноста на финансиските средства да дојде до 16,1 милион евра. Односно, под притисок на неповолните економски ветришта бил издвоен поголем износ на резервации за корпоративното портфолио.
Инаку, кредитниот раст од 11,8 насто бил обезбеден од извори во сопственост на Банката, но и од кредитни линии. Тука се вбројува поддршка за пост-ковид опоравување на корпоративниот сектор, конкурентни услови за кредитирање на домаќинствата и „зеленото финансирање” како помош во енергетската транзиција.
Што се однесува до вкупните депозити, по зголемувањето од речиси два проценти, достигнат е износ од 2,2 милијарди евра.
Зголемени се, за 4,8 насто, акционерскиот капитал и резервите на Комерцијална банка. На крајот од 2022 биле на нивото од 252,8 милиони евра.
Што би рекле Јапонците – среќата помага понекогаш – работата секогаш.
Редакција Пари
