ЗА 6 МЕСЕЦИ ОСНОВАНИ 3.768 ФИРМИ: Во кои градови и дејности претприемачите виделе можност?

СЕРИЈАЛ АНАЛИЗА 3/4

По објавените два серијала на порталот „Пари“, како економскиот амбиент во првото полугодие од годинава се рефлектирал врз ликвидноста на компаниите каде не успеале да преживеаат 4.874 фирими, и вториот анализиран дел кој опфати топ 5 градови по згаснати фирми и каков бил тој тренд минатата година, на ред дојдоа и НОВИТЕ БИЗНИСИ!

Во првите 6 месеци од годинава се отвориле 3.768 фирми, а лани во истот период се отвориле 3.785. Оваа бројка што ја откриваат податоците од платформата БизнисМрежа.мк покажува дека годинава инвеститорите биле дури и повоздржани од пандемиската 2021 година, па за 6 месеци отвориле 17 фирми помалку од истиот период лани. Иако, разликата во бројките е мала, покажува дека, за жал, енергетската криза која почна од крајот на минатата година, и покрај подобрувањата во однос на пандемијата, ги натера инвеститорите да бидат воздржани. Но, исто така, експертите укажуваат и дека растот на цените, како на енергентите, така и на транспортот и на другите суровини, значително удри по ликвидноста на компаниите, па не им остави простор за проширувања и отворања на фирми-ќерки, или на други независни фирми.

Новоотворни фирми во првите 6 месеци во 2022 и во 2021

Извор: БизнисМрежа.мк

Анализата на порталот „Пари“ покажува и во кои градови и во кои дејности најмногу се отвораат фирми. Истовремено, податоците откриваат дали има некаква промена во однос на минатогодишната тенденција.

Во првото полугодие од оваа година, како што е вообичаено, најмногу фирми се отвориле во март – 702, или 18,6 отсто од сите новоотворни фирми.

Извор: БизнисМрежа.мк

ДЕБАРЦА, ЛОЗОВО И РЕСЕН ДОБИЛЕ ПО ЕДНА ФИРМА

Јасно е дека најмногу фирми се отвориле во Скопје, како и во другите поголеми градови, но каде се „случило чудо“ па никнала нова фирма?

Податоците на БизнисМрежа.мк покажуваат дека Дебарца, Лозово и Ресен добиле по една фирма. По две фирми се основале во Карбинци и во Градско. По 3 нови фирми во Чучер-Сандево, Чашка, Маврово и Ростуше, Кривогаштани, Конче и Зрновц. По 4 фирми има во Чешиново-Облешево, Центар Жупа и во Пехчево. По 5 фирми пак, има во Вевчани, Демир Капија и во Могила.

Првата петорка, пак, со најголем број на отворени фирми во првото полугодие од годинава, заеднички  придонела во големото бизнис семејство со 2.285 нови фирми. Лани во истиот период, вкупната бројка на новоотворени фирми во 5 градови каде имало најмногу нови уписи на основање, е 2.155, односно 130 фирми помалку од оваа година.

Извор: БизнисМрежа.мк

Податоците покажуваат дека и годинава најмногу фирми се отвораат во Скопје, Битола и Тетово, со тоа што годинава, за разлика од лани, Битола се покажала поинтресна за новоотвворените фирми од Тетово. Годинава во „првата петка“ влегол и Охрид со 139 новоотворени компани, додека лани иако имал повеќе – 151 компанија, бил на 6-тата позиција.  За годинава, интересен факт е што и во Куманово и во Гостивар се отвориле по ист број на компании, по 127.

НАЈМНОГУ НОВООТВОРЕНИ ВРАТИ ВО ТРГОВИЈАТА

Анализата по дејности, покажува дека исти 5 сектори се во фокусот на инвеститорите, како оваа така и минатата година. Тоа се: трговија, хотелиерско-угостителски сектор, градежништво, услужни дејности и преработувачка индустрија.

Податоците покажуваат дека годинава најмногу новоосновани фирми има во трговијата, односно дека за 6 месеци се отвориле 838 фирми, но лани интресот бил поголем – се отвориле 986 вакви фирми.

Во бизнис-семејството влегоа и  437 фирми од услужниот сектор, 373 хотелско – угостителски капацитети, 306 градежни фирми и 291 фирма од преработуваќката индустрија.

Извор: БизнисМрежа.мк

ПРОДОЛЖУВА..

Четвртиот дел од анализата ќе биде објавен на 25.07.2022

Редакција Пари

Преземањето на авторски содржини (текстови и фотографии) од оваа страница е дозволено само делумно и со ставање на хиперлинк до содржината што се цитира.