Аналитика
Првот човек на „Алкалоид“, Живко Мукаетов, го зајакна сопственичкиот удел во најдобрата македонска фармацевтска компанија. Во сопственост има нови 400 акции.
Во извештајот за промена на сопственоста на член на Управниот одбор и лица со посебни одговорности и овластувања, објавен на Македонска берза, пишува:
„Известуваме дека Живко Мукаетов, претседател на Управниот одбор и генерален директор на АЛКАЛОИД АД Скопје, се стекна со 400 обични акции издадени од АЛКАЛОИД АД Скопје“.
Една реченица и силна порака до инвеститорската јавност, бидејќи потегот укажува на стабилноста и успешноста на компанијата.
Претходно, во март, сите членови на Управниот одбор купија акции од „Алкалоид“, вкупно 800. Тогаш Мукаетов купи 300 акции.
Акцијата на „Алкалоид“ е меѓу најтргуваните на Берзата, со вредност во постојан подем. Последната просечна цена (вчерашен податок) е 20.697,99 денари, додека минатогодишниот просек беше 17.781,93 денари.
Како потестување, минатата година компанијата ја заврши со добивка од 24,7 милиони евра, а оваа ја почна со 6,3 милиони евра по одработеното прво тримесечје.
