Србија ќе им помага на граѓаните да купат електрични возила, субвенциите и до 5.000 евра

Србија издвојува 1,5 милиони евра за субвенции за ЕВ
Српската влада соопшти дека одобрила регулатива за субвенционирано купување на нови електрични возила, одвојувајќи 170 милиони динари (1,5 милиони евра).

Донесувањето на регулативата е една од мерките за подобрување на квалитетот на воздухот, изјави во четвртокот во соопштението министерката за животна средина Ирена Вујовиќ, додавајќи дека субвенциите ќе бидат достапни додека траат доделените средства или најдоцна до 31 октомври.

Субвенциите ќе се движат од 250 евра до 5.000 евра во зависност од типот на возилото.

Право на субвенционирано купување на тие автомобили имаат физичките и правните лица, како и претприемачите, а барањата треба да се достават до Министерството за заштита на животната средина до 31 октомври, се вели во соопштението на Владата на Србија.

Предвидени субвенции за набавка на електричен мопед или лесен трицикл изнесуваат 250 евра во противвредност на динари, и 500 евра за електричен мотоцикл, мотоцикл со странично седиште, тежок трицикл, лесен и тежок четирицикл.

Максималниот износ од 5.000 евра во динарска противвредност е предвиден за електрични патнички возила со најмногу девет седишта, како и за електрични товарни возила со максимална дозволена тежина до 3,5 тони.