СО ТРИ СЕНДВИЧАРИ И ЕДЕН РЕСТОРАН ГОДИШНО „ВРТИ“ НАД 5 МИЛИОНИ ЕВРА: Кој е македонскиот „Мекдонладс“?

Сендвичи, тостови, помфрит, мајонез… за 5,3 милиони евра. Толку вреди ланскиот промет на „Седмица“, спакуван во илјадници нарачки од трите скопски сендвичари и ресторанот – бренд што со децении го носи вкусот на првата плескавица од 1987 година, испорачана во седмиот ден од септември.

Од година во година „Седмица“ е сѐ поуспешна. Реализираниот лански промет е за 8,12 насто повисок од прекланските 4,9 милиони евра. Податоците што Пари ги анализира, покажуваат дека последното остварување е подобро и од тоа во 2023 година, кога бил достигнат прагот од пет милиони евра.

Речиси целиот промет – дури 99,27 отсто – доаѓа од продажбата на готови производи. Со други зборови, сѐ што се приготвува, веднаш се продава. Брзо, едноставно и ефикасно. Зголемувањето во најзначајниот дел од работењето е за 8,63 насто.        

Извор: Бизнис Мрежа

Но, не расте само прометот. Расте и заработката. Нето приходот пред оданочување достигнува речиси 1,2 милиони евра. Компанијата лани обезбедила подобра профитабилност за 12,1 насто во однос на 2024 година. Добивката е солидна ставка во однос на вкупниот промет, што покажува висока бруто-профитна маржа од дури 22,6 насто! Или, во гастрономскиот жаргон, оваа добивка е вистински „чили пипер“ во формирањето на цента на производите.

И движењата кај трошоците се по нагорна линија, но со побавно темпо. Во текот на годината се зголемиле за 7 насто, на 4,1 милион евра. Притоа, најголемиот дел од средствата, од над 61 отсто, завршуваат во набавките на суровини и материјали, потребни за изработка на популарните производи на „7 Фаст фуд“. Од компанијата уверуваат дека плескавиците се направени „од 100% врвно, А класа, јунешко месо“.

Кој барем еднаш влегол во „Седмица“, знае дека редицата купувачи брзо се „чисти“, што е заслуга на организацијата и на добро уиграниот тим. Минатата година за задоволството на муштериите се ангажирале 91 вработен. За двајца помалку од претходно, но очигледно доволно за да се одржи брзината и добрата услуга.

А, цените? Речиси се непроменети и добро им се познати на редовните гости: сендвич со плескавица – 210 денари, хамбургерот „највкусен во градот“ – 250 денари, пилешките варијанти до 290, а најскапиот „биг мек“ е со нешто повисока цена од лани и се продава за 360 денари.

И покрај трендовите на дигитализација и достава, „Седмица“ останува доследна на класичниот пристап – дојди, ќе те услужиме. Токму таа едноставност скопјани ја препознаваат и ја наградуваат речиси четири децении, а довербата што ја ужива локалот најдобро ја отсликува неговото мото: „Нашата цел е никогаш да не ве разочараме“.

М.А

Преземањето на авторски содржини (текстови и фотографии) од оваа страница е дозволено само делумно и важат условите опишани на следниот линк.