Аналитика
Геополитичките тензии сè поочигледно се прелеваат и во воздушниот сообраќај во регионот. Аеродромите во главните градови на поранешна Југославија влегуваат во април со ревидирани распореди, намален број на летови и корекции во капацитетите, како директна последица од случувањата на Блискиот Исток, поскапувањето на горивата и неизвесноста околу снабдувањето.
Според анализата на EX-YU Aviation News, повеќе аеродроми бележат намалување на бројот на седишта во однос на првично планираните капацитети за месецот, иако дел од нив сепак остануваат во раст на годишно ниво.
Најголем пазар во регионот останува Белград, каде што во април се очекуваат 897.733 седишта на редовни летови, речиси 37.000 помалку од првичните планови. Сепак, и покрај оваа корекција, српската престолнина бележи раст од 7,6 проценти во однос на истиот период лани. Доминира националниот превозник, а зад него следуваат неколку големи европски и регионални авиокомпании.
Загреб, пак, бележи поинаков тренд. Со 549.720 планирани седишта, хрватската метропола има намалување и во однос на планот и на годишно ниво, што укажува на послаба динамика на пазарот. И покрај тоа, домашниот превозник останува клучен играч, со умерен раст во однос на минатата година.
Скопскиот аеродром се издвојува како еден од поинтересните примери. Иако во текот на месецот изгуби 6.866 седишта по ревизиите на мрежата, со вкупно 393.355 седишта останува трет во регионот. Уште поважно, бележи значителен раст од 32 проценти во споредба со лани, што укажува на засилен интерес и проширување на мрежата на летови. Најголем удел има нискобуџетниот превозник, следен од турски и регионални авиокомпании.
Од ТАВ Македонија велат дека ситуацијата внимателно се следи и дека, и покрај влијанието од Блискиот Исток, засега не се очекуваат поголеми нарушувања во авиосообраќајот. Генералниот директор Неџат Курт посочува дека најголемиот дел од сообраќајот е насочен кон европски дестинации, што го ублажува ефектот од кризата. Сепак, одредени промени веќе се случуваат, како прекинот на линијата Скопје–Ларнака, која ќе продолжи да се оперира само сезонски поради намалена побарувачка.
И останатите аеродроми во регионот се соочуваат со слични прилагодувања. Приштина и Подгорица бележат умерени намалувања во однос на планот, но сепак остануваат во раст на годишно ниво. Сараево, пак, е меѓу ретките што бележат пад и во споредба со минатата година, додека Љубљана, и покрај значителното кратење на седиштата, задржува солиден годишен раст.
Заедничкиот именител за сите пазари е зголемената неизвесност. Авиокомпаниите сè почесто ги приспособуваат своите мрежи во кратки рокови, реагирајќи на цените на горивата и безбедносните ризици. Иако бројките во моментов не укажуваат на драматичен пад, трендот на корекции покажува дека воздушниот сообраќај останува силно зависен од глобалните случувања.
