Аналитика
Виена – Австриската Raiffeisen Bank International (RBI) објави дека има намера да ја преземе Addiko Bank, при што планира да го задржи нејзиното работење во Хрватска, Словенија и во матичната Австрија, а делот од банкарскиот бизнис во Србија и Босна и Херцеговина да го продаде.
RBI нуди 23,05 евра за акција на Addiko Bank, вклучувајќи ја и дивидендата за 2025 година, се наведува во соопштението. Воедно, се додава дека тоа „одговара на просечната цена на акцијата пондерирана според обемот на тргување во шестмесечниот период кој завршува на 7 април 2026 година“.
Според проценката на Ernst & Young Wirtschaftsprüfungsgesellschaft, понудената цена е приближно 20 насто повисока од вредноста на сопственичкиот капитал.
Прагот за прифаќање на понудата изнесува 75 отсто од акциите на Addiko Bank, со напомена дека за трансакцијата се потребни и регулаторни одобренија.
Откако доброволната јавна понуда ќе биде доставена и прегледана од австриската комора, и откако ќе биде објавен документот, рокот за прифаќање ќе изнесува 10 недели.
RBI ќе го задржи работењето во Хрватска
Во соопштението на RBI се нагласува дека има намера да го задржи работењето на Addiko во Хрватска, Словенија и во Австрија.
Со тоа би обезбедила поголем пазарен удел во Хрватска и според активата би се позиционирала на четвртото место меѓу банките.
Повторно би влегла и на пазарот во Словенија, каде што гледа потенцијал во корпоративното и инвестициското банкарство, како и кај малите и средни претпријатија.
Плановите за БиХ и Србија
Работењето во Србија и Босна и Херцеговина RBI има намера да го продаде, за износ што одговара „најмалку“ на нивната „фер пазарна вредност“.
Новинската агенција APA наведува дека тој имот би требало да биде продаден на Alta Group, пренесува Index.
За Addiko Group
Addiko Group е специјализирана за обезбедување услуги за населението и за малите и средни претпријатија во Централна, Источна и Југоисточна Европа.
Покрај матичната австриска банка, групацијата има филијали во Хрватска, Словенија, Босна и Херцеговина, Србија, Црна Гора и Романија.
За работењето во Романија е надлежна подружницата во Словенија, преку т.н. „ЕУ пасош“.
Финализација на преземањето
Доколку понудата биде прифатена, преземањето во почетната фаза би ја намалило стапката на адекватност на капиталот (CET1) на RBI Групацијата за 0,45 процентни поени, под претпоставка дека ќе се прифатат 75 отсто од акциите. Кога ќе се вклучи продажбата на работењето во Србија, БиХ и Црна Гора, намалувањето би изнесувало околу 0,1 процентен поен.
На крајот на 2025 година, CET1 стапката на ниво на група изнесувала 17,9 насто, покажува годишниот извештај. Без работењето во Русија, изнесувала 15,5 насто.
Финализацијата на доброволната јавна понуда се очекува во четвртиот квартал од оваа година, додека завршувањето на издвојувањето на деловите од работењето се очекува во втората половина на 2027 година.
