Аналитика
Осомничени севернокорејски хакери се обиделе да упаднат во системите на британскиот производител на лекови АстраЗенека во последните неколку недели.
Хакерите се претставиле како регрутери на LinkedIn и WhatsApp за да им пристапат на вработените во АстраЗенека со лажни понуди за работа, велат изворите. Потоа, тие испратија документи за кои се претпоставува дека се описи на работните места, кои имале малициозен код, дизајниран да добие пристап до компјутерот на жртвата.
Хакерските обиди беа насочени кон „широк спектар на луѓе“, вклучително и персонал кој работи на истражување на КОВИД-19, рече еден од изворите, но не се смета дека биле успешни.
Севернокорејската мисија во Обединетите нации во Женева не одговори на барањето за коментар.
АстраЗенека, која се појави како една од трите најдобри креатори на вакцини, одби да даде коментар.
Изворите, кои сакаа да останат анонимни за да разговараат за информации од јавен карактер, рекоа дека алатките и техниките користени во нападите покажале дека тие биле дел од тековната хакерска кампања што американските власти и истражувачи за сајбер безбедност ја припишувале на Северна Кореја.
Кампањата претходно се фокусираше на одбранбени компании и медиумски организации, но беше насочена кон цели поврзани со КОВИД во последните неколку недели, според три лица кои ги истражувале нападите.
Кибернетичките напади против здравствените тела, научниците за вакцини и производителите на лекови се зголемија за време на пандемијата, додека групите за хакерски напади поддржани од државата се обидоа да ги добијат најновите истражувања и информации за епидемијата.
Мајкрософт соопшти овој месец дека се соочил со две севернокорејски хакерски групи насочени кон развивачи на вакцини во повеќе земји, вклучително и со „испраќање пораки со измислени описи на работни места“. Мајкрософт не именуваше ниту една од целните организации.
Јужнокорејските пратеници во петокот изјавија дека разузнавачката агенција на земјата спречила некои од тие обиди.
Ројтерс претходно објави дека оваа година хакери од Иран, Кина и Русија се обиделе да упаднат во водечките производители на лекови, па дури и во Светската здравствена организација. Техеран, Пекинг и Москва ги негираа обвинувањата.
Некои од сметките користени во нападите врз АстраЗенека се регистрирани на руски е-адреси, рече еден од изворите, во можен обид да ги доведе во заблуда истражителите.
