Аналитика
Синџирите на продавници за храна во најмалку три европски земји пријавија неочекувани скокови на температурата во фрижидерите и замрзнувачите во понеделникот, што ја уништи храната – втор пат за помалку од еден месец слични инциденти предизвикаа загриженост за сајбер напади врз сè повеќе меѓусебно поврзаната инфраструктура.
Холандскиот трговец на мало со храна „Ахолд Делхајз“ и „Колрујт“ во Белгија соопштија дека ИТ инцидент во текот на ноќта предизвикал зголемување на температурите во фрижидерите и замрзнувачите во десетици нивни продавници во Белгија и Луксембург, додека шведските синџири „ИЦА“ и „Кооп“ пријавија слични скокови, при што еден продажен објект експлицитно обвини за сајбер напад, според новинската агенција „Ројтерс“.
Инцидентите се случуваат помалку од три недели откако неколку француски синџири на супермаркети соопштија дека биле погодени од сајбер напад што ги зголемил температурите во фрижидерите до 122 степени Фаренхајт во стотици продажни места.
Француските синџири „Е. Леклерк“, „Интермарше“ и „Кооператив У“ изјавија за новинската агенција АФП минатиот месец дека претрпеле сајбер напад.
Во понеделник, Ројтерс соопшти дека Ахолд, холандскиот синџир на продавници за храна, пријавил инцидент со сајбер безбедност во полицијата во Холандија во октомври, откако открил сомнителна активност во својата инфраструктура. Синџирот сфатил дека има зголемување на температурата во системите за ладење во понеделник, изјави портпаролката на Делхајз, Сара Де Мистер, за Ројтерс.
Извршниот директор на белгиската компанија за ладење Сабкобел, која ги управува системите што ги користат Делхајз и другите синџири, изјави за белгиската национална новинска агенција Белга дека сајбер нападот е причина откако испарувачите на фрижидерите и замрзнувачите беа префрлени во режим на одмрзнување. „Почнавме да мобилизираме техничари во 1 часот наутро за да ја ставиме ситуацијата под контрола“, изјави Стефан Моланс за Белга. „Работевме цела ноќ и утро за да ги исклучиме погодените единици од мрежата.“
„Во текот на изминатите неколку недели, работевме многу напорно за да ги заштитиме фрижидерите на нашите клиенти од оваа ранливост“, изјави тој за новинската агенција, но додаде дека многу единици ќе бараат физички модификации и „тоа бара инвестиции“.
Во неколку шведски супермаркети, рано во понеделникот, температурите во фрижидерите и замрзнувачите нагло се зголемиле, соопштија два трговски ланци, што ги принудило да ја фрлат расипаната храна. Од „ICA“ и „Coop“ за агенцијата АФП изјавија дека немаат моментални информации дека нивните системи биле цел на сајбер-напад.
Од „ICA“ за АФП изјавија дека е зафатен „ограничен број“ од нивните продавници, но не наведоа конкретна бројка. Една од нивните продавници, во градот Шебо (Sjöbo) во јужна Шведска, објави на Фејсбук дека нивните фрижидери и замрзнувачи биле „хакирани, при што температурата била поставена на 50 степени Целзиусови.
„Истражуваме што точно се случило и кои се размерите на настанот“, изјави портпаролката Хелена Јохансон за АФП, додавајќи дека компанијата е фокусирана на тоа како да им помогне на погодените продавници.
Од ланецот „Coop“ соопштија дека шест од нивните околу 800 продавници во Шведска имале проблеми со фрижидерите и замрзнувачите, поради што морале да ја фрлат храната. Портпаролот на компанијата, Карлос Кансино, за АФП изјави дека уредите „или целосно престанале да работат, или претрпеле делумно оштетување“.
„Не сум добил никакви информации дека станува збор за сајбер-напад“, рече тој.
На 12 октомври, големи француски трговски ланци објавија дека стотици нивни продавници биле погодени од сајбер-напад врз системите за ладење, што ги принудило да фрлат храна и предизвикало загриженост за безбедноста на храната. Во тој инцидент, цел на нападот биле системите за контрола на ладењето од данскиот производител „Danfoss“.
Досега никој нема преземено одговорност за ниту еден од хакерските напади врз трговците со прехранбени производи во Европа.
Коментирајќи го случајот од минатиот месец, кога француските продавници беа принудени да фрлат тони храна поради хакерски напад за кој сè уште не се знае кој стои зад него, еврокомесарот за земјоделство и храна, Кристоф Хансен, во објава на платформата „X“ истакна дека „безбедноста на храната бара поголемо внимание на сите нивоа“. Тој додаде дека „злоупотребата“ на ранливостите во ваквите клучни, меѓусебно поврзани системи, претставува нова „реалност“.
„Нападот врз опремата што е од суштинско значење за зачувување на свежите производи и за снабдувањето со храна на француското население е исклучително сериозен и без преседан“, напиша минатиот месец на „X“ Доминик Шелшер, извршен директор на „Cooperative U“.
Обвинителите во Париз го потврдија сајбер-нападот и наведоа дека тој зафатил и други големи трговски ланци, при што дошло и до појава на пожари поради прегревање на одредена опрема.
