Аналитика
Речиси две петтини од електричната енергија потрошена во Европската унија во 2020 година дошла од обновливи извори, соопшти во средата канцеларијата за статистика на ЕУ, ЕУРОСТАТ, иако нејзиниот напредок се уште е во сенка на оној на нејзините нордиски соседи Исланд и Норвешка. Земјите од ЕУ повеќе користеа обновливи извори на енергија, односно 37 отсто од нивната бруто потрошувачка на електрична енергија во споредба со 34 отсто во 2019 година, соопшти Еуростат, иако стапките варираат во голема мера низ регионот.
Австрија и Шведска го предводат блокот со обновливите извори на енергија со повеќе од три четвртини од електрична енергија произведени од „зелени“ извори, проследени со над 50% удел во Данска, Португалија, Хрватска и Латвија. Надвор од ЕУ, и Исланд и Норвешка произведуваа повеќе енергија од обновливи извори од вкупната електрична енергија што ја трошеа.
Норвешка, која инаку е најголемиот производител на нафта во Западна Европа, генерира најголем дел од својата електрична енергија од хидроенергија, додека Исланд, исто така, го користи изобилието на геотермална енергија благодарение на вулканско потекло на островот.
Унгарија, која нема излез на море, заостанува зад остатокот од континентот заедно со јужните островски држави Малта и Кипар, при што обновливите извори сочинуваат околу 10% од нивната потрошувачка на електрична енергија.
Еуростат соопшти дека ветерот и хидроенергијата доминирале со повеќе од две третини од секторот за обновливи извори на енергија на блокот од 27 земји во 2020 година, иако нејзиниот трет најголем придонесувач, сончевата енергија, беше најбрзорастечкиот извор. Моќта генерирана од сончева светлина сочинуваше 14% од потрошувачката на електрична енергија во ЕУ во 2020 година, во споредба со само 1% во 2008 година.
Минатата недела Евростат објави дека земјите-членки на ЕУ ја надминале целта од 20 отсто за потрошувачка на обновлива енергија во 2020 година, земајќи ја предвид употребата во транспортот и регулирањето на топлината, како и електричната енергија.
