Аналитика
Американскиот банкарски систем е во опасна позиција, а ФЕД не може да победи што и да прави со каматните стапки, според „Д-р Пропаст“, американскиот економист Нуриел Рубини. Рубини, кој ја предвиде рецесијата во 2008 година и е познат по своите прогнози за мрак и пропаст на Волстрит, предупреди на проблеми кои произлегуваат од неодамнешниот колапс на Silicon Valley Bank, што предизвика страв од банкарска криза.
„Тоа е исклучително опасен момент, бидејќи сега има значителен стрес во некои делови на американскиот банкарски систем во време кога инфлацијата е сè уште превисока“, рече главниот економист во интервју за ТВ Блумберг во петокот.
Тоа ги остава централните банкари во ситуација на загуба-загуба, рече тој, бидејќи ФЕД е растргнат помеѓу борбата против инфлацијата, што го прави со зголемување на каматните стапки или намалување на финансиската нестабилност, што може да го направи со олеснување на стапките.
Зголемувањето на стапките може да предизвика поголема нестабилност со потресување на банкарскиот систем, но намалувањето на стапките како одговор на превирањата може да предизвика инфлацијата повторно да излезе од контрола, што ќе доведе до стагфлациска криза, предупреди тој.
„Во извесна смисла, централните банки сега се проколнати ако го сторат тоа, проколнати ако не го сторат тоа“, рече Рубини.
Таа дилема, во комбинација со зголемените нивоа на долг, ги прави САД врзани за рецесија, додаде тој. Познат како „пермабеар“ на Волстрит (некој кој секогаш е негативен за идната насока на пазарите и економијата воопшто, без разлика на се, н.з.), тој со месеци предупредуваше на пад и стагфлациска должничка криза, а претходно предвиде дека акциите би можеле да паднат за уште 30% бидејќи САД се борат со високата инфлација, слабиот раст и должничките проблеми кои се ривал на кризата од 2008 година.
„Мислам дека што и да направат, ќе завршат во неволја. Затоа што во овој момент е предоцна да се најде решение што ќе спречи тешко слетување и ќе спречи сериозни финансиски стресови“, додаде тој.
Тоа го повторува ставот на другите аналитичари, кои велат дека се предвидува рецесија и поголема болка на берзата. Коосновачот на DataTrek, Николас Колас, изјави за Insider дека очекува пад во текот на следната година, а „Кралот на обврзниците“ Џеф Гундлач рече дека предвидува пад кој доаѓа во следните четири месеци, што укажува на проблематичен индикатор во кривата на принос на американското Министерство за финансии.
Пазарите очекуваат Банката на федерални резерви да издаде уште едно зголемување на каматните стапки за 25 базични поени на нивниот следен состанок оваа недела, пред да ги паузира напорите за монетарно стегање и намалување на стапките подоцна во годината.
Централните банкари веќе ги зголемија каматните стапки за 450 базични поени во текот на минатата година за да се борат против инфлацијата, потег што се заканува да ги турне САД во рецесија и е делумно одговорен за големите загуби забележани во SVB и другите американски банки, велат експертите.
