Аналитика
Цените на нафтата се зголемија на светските берзи минатата недела, петти пат по ред, бидејќи инвеститорите се надеваат дека наскоро, благодарение на вакцинацијата против Ковид-19 и новите економски стимуланси во САД, побарувачката за „црно злато“ ќе се зголеми.
Цената на барелот на лондонскиот пазар минатата недела порасна за 1,7 проценти постигнувајќи вредност од 49,25 долари, додека на американскиот пазар за еден барел порасна 1,9 проценти постигнувајќи вредност од 46,26 долари.
Цените на нафтата растат пет недели по ред откако беа објавени вести за развој на првата вакцина за корона вирусот, што ги зголемува надежите дека економската активност во светот наскоро ќе се врати во нормала, што треба да ја зголеми побарувачката за „црно злато“.
Благодарение на тоа, цените на нафтата достигнаа рекорд од март, кога започна корона кризата.
Инвеститорите минатата недела беа охрабрени и од оптимистичките пораки на пратениците од демократите и републиканците во Конгресот на САД за нови мерки за помош на економијата во борбата со кризата.
Во тек се преговори за предлагање пакет фискален стимул во вкупна вредност од околу 908 милијарди долари.
За новиот стимулативен пакет се преговараше со месеци, а аналитичарите сметаат дека договор ќе се постигне наскоро, бидејќи сите најнови податоци укажуваат на забавување на заздравувањето на најголемата светска економија во корона кризата.
„Цените се зголемија, и покрај некои негативни вести. Раст на пазарот се очекува поради вестите за поттик на американската економија“, рече Боб Јаугер, директор за енергија во банката„ Мизухо “.
