Аналитика
Генералниот директор и претседател на Управниот одбор на Алкалоид, Живко Мукаетов, учествуваше на бизнис-средбата меѓу Македонија и Хрватска, организирана со поддршка на владите на двете земји, каде што беа претставени можностите за продлабочување на економската соработка и за нови партнерства меѓу компаниите.
Хрватска останува еден од традиционалните пазари на Алкалоид, каде што компанијата е присутна уште од шеесеттите години на минатиот век. Подружницата во Загреб денес има околу 60 вработени и функционира преку два ентитета – тим за хрватските операции и правна служба задолжена за целата Европска унија.
Во текот на минатата година пласманите на Алкалоид на хрватскиот пазар достигнале 21 милион евра. Производното портфолио опфаќа фармацевтски, козметички и билни производи, меѓу кои и брендовите Кафетин, Прокулин и Бекутан.
Бизнис форумот се одржа во рамки на посетата на хрватската делегација, предводена од премиерот Андреј Пленковиќ, на Македонија.
Во однос на економската соработка меѓу двете земји, трговската размена изнесува околу 300 милиони евра, при што и двете влади оценуваат дека постои значително поголем потенцијал за нејзино унапредување.
