Аналитика
Во време кога дигиталната трансформација напредува со несопирливо темпо, а јавниот сектор станува сè поизложен на ИТ ризици, улогата на врховните ревизорски институции станува сè поважна за заштита на критичната инфраструктура и зајакнување на довербата во јавните услуги.
На оваа тема, тројца претставници на Државниот завод за ревизија на Северна Македонија – Зоран Ристовски, Владимир Николоски и Славица Маневска – активно учествуваа на регионалната работилница „ИТ ревизија – развој и предизвици“, што се одржа на 29 и 30 мај 2025 година во Приштина, Косово. Настанот беше организиран од страна на Националната канцеларија за ревизија на Косово.
Претставниците на ДЗР на работилницата ги презентираа клучните наоди и предизвици од спроведените ИТ ревизии во Македонија, со посебен фокус на две теми:
- Ефективноста на националниот портал за е-услуги
- Мерките за заштита на критичните ИТ системи
Преку овие излагања, ДЗР уште еднаш потврди дека вложува континуирани напори во развојот на ИТ ревизорските капацитети и во следење на глобалните трендови за заштита на јавниот интерес во дигиталното опкружување.
Работилницата собра учесници од повеќе држави – Полска, Турција, Албанија, Хрватска, Естонија и Косово, а преку виртуелна вклученост учествуваа и претставници од Португалија, како и од Меѓународната организација IDI. Со тоа, настанот доби силна регионална и меѓународна димензија.
Споделувањето на искуства, знаења и добри практики, како што истакнуваат организаторите, е клучно за заеднички напредок и поголема ефективност во справувањето со ризиците што произлегуваат од новите технолошки предизвици.
