Аналитика
Буџетскиот дефицит во 2023 најверојатно ќе биде од 660 до 725 милиони евра. Според анализите на Министерството за финансии, наредната година растот на бруто домашниот производ ќе биде од 2,9 до 3,1%, а инфлацијата 11,6 насто.
Министерот за финансии Фатмир Бесими најави дека наредната, 2023 година буџетскиот дефицит, односно парите кои државата планира да ги потроши, а нема да ги собере како приходи, туку ќе бидат обезбедени преку нови задолжувања на државата, ќе бидат меѓу 4,2 и 4,6 отсто од бруто домашниот производ (БДП). Иако овој процент претставува намалување на дефицитот во споредба со планираниот за оваа 2022 година, кога Владата планира кусок од 695 милиони евра или 5,1% од БДП (во пресметката на БДП за 2022 земен е прелиминарниот податок на ДЗС за износот на БДП за 2021 зголемен за очекуваниот раст и инфлација за годинава), во апсолутен износ оваа сума повторно ќе биде голема.
Ако во 2023 економијата порасне според предвидувањата на Министерството за финансии од 2,9 до 3,1 насто, а инфлацијата биде 11,6%, дефицитот или новиот долг ќе се движи од 660 до 725 милиони евра.
Да потсетиме дека нашиот сајт (http://pari.com.mk/gragjanite-duplo-ke-gi-finansisraat-dolgovite-na-vladata/) веќе правеше анализа на можното зголемување на јавниот долг и на буџетскиот дефицит бидејќи во Стратегијата за управување со јавниот долг 2023 – 2025 за наредната година се планира максималниот лимит за ново нето задолжување да биде до 850 милиони евра. Со првичните проекции на буџетот за 2023 година, овие бројки се доближуваат до проекциите на нашиот портал.
Автор на текстот: ГОРАН ТЕМЕНУГОВ новинар
