Аналитика
Човештвото би можело да стигне до Црвената планета и Месечината порано отколку што мислиме. Претседателката и главниот оперативен директор на SpaceX, Гвин Шотвел, во интервју за Си Ен Би Си најави дека луѓето ќе стигнат на Марс пред крајот на 2020-тите. Шотвел рече: „Треба да ставиме луѓе на површината на Марс во рок од една деценија“. Таа потоа додаде: „Мислам дека треба да добиеме голема испорака на површината на Марс, а потоа луѓето ќе почнат посилно да размислуваат за тоа“, додавајќи „тогаш, мислам дека во рок од пет или шест години, луѓето ќе видат дека тоа ќе биде вистинско место за одење“.
Маск: Живеењето на Марс можеби ќе биде опасно
Нејзините коментари ги повторуваат сличните предвидувања на извршниот директор на SpaceX, Илон Маск, во декември. Маск во интервју за подкастот Лекс Фридман рече дека мислел дека во најдоброто сценарио, луѓето ќе бидат на Црвената планета за околу пет години, додека најлош случај би бил десет години.
Тој, исто така, рече дека најголемиот предизвик на компанијата е да изработи возило што може да ја оптимизира тонажата во орбитата, а потоа до Марс: „Starship е најкомплексната и најнапредната ракета што некогаш била направена“, додаде Маск.
Неодамна, технолошкиот магнат даде уште едно предвидување: дека луѓето ќе бидат на Марс во 2029 година. Во едно свое скорешно интервју, Маск истакна дека живеењето на Марс „ќе биде опасно, тесно, тешка, напорна работа“.
Компанијата на Илон Маск си постави амбициозна мисија да го направи вселенското патување подостапно за човештвото. SpaceX развива ракета за повеќекратна употреба наречена Starship која има за цел да носи луѓе на Месечината, Марс и на други места. На пример, јапонскиот милијардер Јасуко Маезава ја резервира ракетата за патување околу Месечината во 2023 година.
10 години прерано?
SpaceX работи на првиот орбитален тест лет на Starship, од неговата база во Тексас.Бродот би можел повеќекратно да се употребува и да носи екипаж и товар на Месечината и Марс. Сепак, во моментов се чека еколошка проценка од Федералната управа за воздухопловство на САД (FAA). FAA го одложи прегледот на новото лансирање на SpaceX веќе четири пати.
Додека SpaceX допрва треба да донесе луѓе на Месечината, компанијата направи успешни летови до Меѓународната вселенска станица (ISS). НАСА, исто така, го избра Starship за програмата Артемис, чија цел е да постави астронаути во близина на јужниот пол на Месечината во 2025 година.
Но, друга мисија на Артемис е да стигне од Месечината до Марс околу 2040 година, околу 10 години по предвидувањата на Шотвел. Ова значи дека SpaceX би можел да ја надмине НАСА, но бидејќи Маск обезбедува многу техничка опрема за НАСА, тие може на крајот сепак да работат заедно.
Можете да заштедите за карта за на Марс!
Последната мисија меѓу НАСА и Спејс Икс се случи минатиот петок, откако третиот долготраен тим астронаути на Спејс Икс се врати на Меѓународната вселенска станица безбедно назад на Земјата за да ги заврши повеќемесечните орбитални истражувања од пиперки од вселената до роботиката.
Маск, неодамна изјави дека луѓето, сè додека „работат и штедат“ ќе можат да си дозволат билет со шест цифри за патување на Марс. Тој претходно процени дека билетот за Марс на летот на SpaceX би чинел помеѓу 100.000 и 500.000 долари, додавајќи дека неговата компанија сака „да ја направи достапна за секој што сака да оди“.
