Возачите можат да здивнат: дизелот поевтин за 2,5 денари, бензините за 1,5 денари

Горивата поевтинуваат, во просек, за 2,73 отсто. Од полноќ еден литар Еуродизел ќе се точи за 95,5 денари, Еуросупер БС-95 по 82 денари, а Еуросупер БС-98 ќе чини 84 денари. Регулаторната комисија за енергетика донесе одлука за утврдување на највисоките малопродажни цени на нафтените деривати и горивата за транспорт.

Според одлуката, новата цена на екстра лесното масло за домаќинство (ЕЛ-1) е 96,5 денари за литар. Цената на мазутот М-1 НС ќе изнесува 49,227 денари за килограм.

Од Регулаторната комисија појаснуваат дека корекцијата е резултат на намалување на референтните цени на светските берзи, како и на движењата на курсот на денарот во однос на американскиот долар.

Бензините се намалуваат, во просек, за околу 2,703 отсто, дизелот за 3,251 отсто, екстра лесното масло за 3,960 отсто, додека кај мазутот е забележано намалување од околу 4,476 отсто.

Во образложението се наведува дека при формирањето на цените се земени предвид и акцизите, трошоците за дистрибуција, надоместоците за резерви и еколошките давачки, согласно важечката методологија.