Аналитика
Кинескиот производител Leapmotor, кој во Европа настапува преку заедничката компанија со Stellantis, станува еден од најбрзорастечките автомобилски брендови на континентот. Најновите податоци на ACEA покажуваат дека во првите осум месеци од 2026 година брендот регистрирал 73.297 автомобили во Европа, речиси пет и пол пати повеќе од истиот период лани.
На поширокиот европски пазар, кој ги опфаќа ЕУ, земјите од EFTA и Обединетото Кралство, регистрациите на Leapmotor во периодот јануари–август пораснале за 449,9%, на 73.297 возила. Само во ЕУ, брендот стигнал до 62.508 регистрации, што претставува раст од 426,8%.
Бројките покажуваат дека Leapmotor веќе не е експеримент на Stellantis со кинески бренд, туку станува една од најбрзо растечките автомобилски марки во Европа.
Темпото е впечатливо и во споредба со многу попознати конкуренти. За истиот период Tesla регистрирала 191.787 автомобили во ЕУ+EFTA+UK, со раст од 43,3%, додека BYD достигнала 234.099 регистрации и пораснала за 144,1%. Chery, заедно со своите европски брендови Omoda, Jaecoo и Jetour, стигнала до 207.871 возило, со раст од 279,7%, а SAIC, сопственикот на MG, продала 230.290 возила, со раст од 19,7%.
Со други зборови, Leapmotor сè уште е значително помал по обем од BYD, SAIC и Tesla, но расте многу побрзо од нив.
Во поширокиот контекст, европскиот автомобилски пазар во првите осум месеци од годинава пораснал за 5,3%, додека продажбата на целосно електрични автомобили во ЕУ скокнала за 44,9%, на 1,64 милиони возила. Leapmotor, со раст од над 400%, се движи со темпо што е повеќекратно повисоко и од пазарот во целина и од BEV сегментот.
LEAPMOTOR ВЕЌЕ ПОГОЛЕМ ОД МНОГУ ТРАДИЦИОНАЛНИ БРЕНДОВИ
Колку брзо се менува позицијата на брендот покажуваат и податоците од првите пет месеци од 2026 година. Во тој период Leapmotor имал 43.037 регистрации во Европа, повеќе од Honda со 33.527 и значително повеќе од Mitsubishi со 12.156 возила. Во однос на истиот период од 2025 година, Leapmotor тогаш веќе бележел раст од 552,9%.
Тоа е значаен сигнал, бидејќи Leapmotor до неодамна беше практично непознат бренд за европските купувачи, додека Honda и Mitsubishi имаат децениско присуство на континентот.
Сепак, разликата во однос на најголемите традиционални производители и понатаму е огромна. Volkswagen Group, на пример, во првите пет месеци од годинава имал над 1,5 милиони регистрации, Stellantis над 900.000, Renault Group повеќе од 535.000, а BMW Group над 409.000.
Затоа Leapmotor сè уште не е закана по обем за европските гиганти, но неговата динамика покажува дека брзо излегува од категоријата „мал нов кинески бренд“.
ПРЕДНОСТА ШТО МУ ЈА ДАВА СТЕЛАНТИС
Една од најголемите предности на Leapmotor во Европа не е само цената на автомобилите, туку партнерството со Stellantis.
Заедничката компанија Leapmotor International е под контрола на Stellantis, кој поседува 51%, а преку неа кинескиот бренд ја користи постојната европска продажна и сервисна инфраструктура на групацијата.
Само пред една година Leapmotor имаше околу 800 продажни и сервисни точки во Европа. Во септември 2026 година мрежата веќе надмина 1.000 локации, а според компанијата просечниот европски купувач сега е на околу 22 минути возење од најблискиот продажен или сервисен центар.
Во август Европа учествувала со дури 27% од глобалните испораки на Leapmotor, највисок удел досега.
Токму тука Leapmotor има предност во однос на многу други нови кинески брендови: не мора од нула да создава мрежа на дилери, сервиси, логистика и резервни делови.
ОД УВОЗ ДО ПРОИЗВОДСТВО ВО ЕВРОПА
Следниот чекор е уште поважен – локално производство. Stellantis и Leapmotor во мај објавија план за продлабочување на соработката, според кој SUV моделот B10 би можел да почне да се произведува во фабриката на Stellantis во Сарагоса уште во 2026 година. Дополнително, фабриката во Villaverde кај Мадрид треба да добие идни модели на Leapmotor наменети за европски и други пазари.
Тоа е стратешки важен чекор и поради европските царини за електрични автомобили произведени во Кина. Производството во Шпанија би му овозможило на Leapmotor дел од идните модели да ги продава како европски произведени автомобили и истовремено да ги намали логистичките трошоци.
Партнерството оди и подлабоко: Stellantis планира да користи делови и набавки преку екосистемот на Leapmotor за да ги намали трошоците и кај сопствените европски електрични модели.
Европската стратегија на Leapmotor се проширува и по сегменти.
Брендот почна со малиот електричен T03 и SUV моделот C10, а потоа го додаде B10. Во 2026 година портфолиото дополнително се проширува со B05, електричен хечбек од C-сегментот, и B03X, компактен електричен SUV. Истовремено се нудат и range-extender верзии на дел од SUV моделите, наменети за купувачи кои сакаат електрично возење без целосна зависност од инфраструктурата за полнење.
Во март 2026 Leapmotor веќе надмина 11.000 регистрации во Европа во еден месец, што беше раст од 754% во однос на март 2025. Тогаш брендот достигна 3,2% удел во европскиот BEV сегмент, а во Италија дури 33,5% во конкретната категорија што ја следи компанијата.
КИНЕЗИТЕ СЕ ВЕЌЕ ТУКА
Растот на Leapmotor е дел од многу поширок тренд.
Само BYD, SAIC, Chery и Leapmotor во август заедно регистрирале 56.849 автомобили во ЕУ, или околу 8% од целиот пазар за тој месец. Една година претходно нивниот заеднички удел бил околу 4,2%. Во првите осум месеци нивниот удел се искачил на околу 6,9%, од 3,5% една година претходно.
Тоа значи дека притисокот врз европските, јапонските и корејските производители веќе не доаѓа само од BYD или MG. На пазарот паралелно растат неколку кинески групации, а Leapmotor се издвојува со особено агресивна динамика.
Најголемиот тест допрва следува – Да се зголеми продажбата од неколку илјади на 70.000 возила е едно; да се достигне неколку стотици илјади автомобили годишно и да се одржат остаточната вредност, квалитетот, сервисот и довербата кај купувачите е многу потешко.
