Инвестиција во животната средина: Вработените на НЛБ банка вложија повеќе од 400 волонтерски часови

Грижата за животната средина како дел од корпоративната стратегија повторно се ефектуира во конкретна акција на терен. Повеќе од 130 вработени во НЛБ банка, меѓу кои и членовите на Управниот одбор, се вклучија во еколошката акција за расчистување на отпадот на планината – заштитен знак на Скопје. Под мотото „За почисто Водно“, еко-волонтерите го отстрануваа отпадот од зелените површини и од рекреативните патеки.

Во реализацијата на еколошките иницијатива, досега се вложени повеќе од 400 волонтерски часови. Тие се потврда за посветеноста на Банката кон заштита на природата и унапредување на квалитетот на животот во заедницата, покажувајќи на дело колкава е важноста на одговорниот однос кон природата и јавниот простор. Особена вредност на настанот, истакнуваат од НЛБ банка, му дава ангажирањето на децата, што дополнително ја нагласува потребата од градење еколошка свест, зачувување на природните ресурси и негување на одговорен однос кон животната средина кај идните генерации.

„Во НЛБ Банка веруваме дека вистинската одговорност кон заедницата се мери преку конкретни дела. Грижата за животната средина не е само наша стратешка определба, туку и обврска што ја живееме секојдневно, со личен пример, со активна вклученост и со јасна намера да придонесеме за подобар свет за генерациите што следат. Како институција што е длабоко поврзана со заедницата, ќе продолжиме да иницираме и поддржуваме активности што создаваат трајна вредност, ја јакнат еколошката свест и оставаат позитивен белег во просторот во кој живееме и работиме“, нагласуваат од Банката.

Меѓу еко-иницијативите спроведени во изминатиот период, се и – акцијата за чистење на отпад во Виница под мотото „За почиста Виница“, во која учествуваа вработените во експозитурите од источниот регион; и донацијата на садници од лаванда за Холандскиот парк во Охрид, што ги засадија учесниците на Лидерската конференција на Банката.

Еко-свесните и општествено одговорни активности претставуваат значаен сегмент од стратегијата на НЛБ Групацијата и се спроведуваат во сите земји каде што таа е присутна.