Аналитика
Пакет енергетска поддршка за регионот на Западен Балкан најави претседателката на Европската Комисија, Урсула фон дер Лајен по самитот во Берлин. Таа соопшти дека целта на самитот во Берлинскиот процес е продлабочување на економската интеграција и додаде дека пакетот енергетска поддршка за Западен Балкан во вредност од една милијарда евра ќе помогне во обликувањето на заедничката енергетска иднина.
Заедно со фотографија од средбата во Берлин, Фон дер Лајен во објава на Твитер го изрази своето задоволство што сите партнери од Западен Балкан дојдоа на самитот, една недела по нејзината посета на регионот. „Тука сме да ја продлабочиме соработката. Почнуваме со енергија. Нашиот пакет енергетска поддршка за Западен Балкан, вреден една милијарда евра, ќе ни помогне да ја обликуваме заедничката енергетска иднина“, изјави таа по самитот во Берлин.
За време на Самитот, како и за време на нејзината мисија во регионот минатата недела, претседателката најави значителен пакет енергетска поддршка од 1 милијарда евра грантови од ЕУ за да му помогне на Западен Балкан да ги реши непосредните последици од енергетската криза и да изгради отпорност на краток и среднорочен.
„ЕУ продолжува да стои зад Западен Балкан – и во добри времиња и во тешкотии. За време на пандемијата Ковид-19, мобилизиравме неспоредлив пакет од 3,3 милијарди евра за регионот и денес составуваме пакет енергетска поддршка од 1 милијарда евра за да ги заштитиме најранливите групи и да ги поттикнеме многу потребните инвестиции во диверзификација на енергијата. Ние инвестираме во економското ткиво на регионот за да напредуваме во транзицијата на чиста енергија и да излеземе позелени, посилни и поодржливи од тековната криза“, изјави фон дер Лајен на конференцијата во Берлин.
Наскоро, Комисијата е подготвена да обезбеди буџетска поддршка од 500 милиони евра, која ќе биде усвоена во декември и достапна во јануари. Оваа сума ќе ги поддржи домаќинствата и малите и средните претпријатија да го амортизираат поскапувањето на енергијата и нивното влијание.
ПРВАТА ПОМОШ ЗА БАЛКАНОТ „ТЕШКА“ 500 МИЛИОНИ ЕВРА
На краток и среден рок, Комисијата ќе обезбеди уште 500 милиони евра за унапредување во енергетската диверзификација, производството на обновлива енергија и интерконекции на гас и електрична енергија преку Инвестициската рамка за Западен Балкан. Краткорочните мерки (следните 1-2 години) ќе поддржат диверзификација на снабдувањето со енергија, преку зајакнување на интерконекторите за гас и електрична енергија, вклучувајќи ЛНГ, како и со поддршка на изградбата на проекти за обновлива енергија и мерките за енергетска ефикасност, се вели во соопштението за печат на Европската Комисија.
Среднорочната помош (следните 2-3 години) ќе вклучи и други инвестиции кои ќе придонесат за енергетската транзиција и безбедност. Овие мерки ќе опфатат големи проекти за производство на обновлива енергија, надградба на системи за пренос на енергија, централно греење и шеми за енергетска ефикасност за старите станбени блокови.
Самитот, информира ЕК, исто така, се фокусираше на напредокот постигнат од регионот во рамките на Заедничкиот регионален пазар; регионалната иницијатива за која лидерите од Западен Балкан се договорија во Софија во 2020 година, со која се обединија шесте економии, како и за спроведување на Економскиот и инвестицискиот план (ЕИП) започнат во октомври 2020 година, се вели натаму во соопштението на ЕК.
Регионот ја одобри и декларацијата за соработка во енергетската безбедност, во која лидерите се обврзаа да ги удвојат нивните напори за спроведување на Зелената агенда за Западен Балкан усогласена со Зелениот договор на ЕУ. Оваа соработка ќе придонесе за поголема енергетска диверзификација и почиста енергија, како и за забрзување на реформите на нивните национални енергетски пазари за усогласување со ЕУ.
