Аналитика
Најбогатите 10 луѓе во светот го удвоиле своето богатство за време на пандемијата – од 700 милијарди долари на 1,5 трилиони долари, според најновиот извештај за нееднаквост на Оксфам, кој забележува дека „ако првите 10 милијардери седнат врз купот банкноти од американски долари сочинет од нивното вкупно богатство, тие би стасале на речиси половина пат до Месечината“.
Традиционално, добротворната организација со седиште во Велика Британија објавува извештај за нееднаквоста во времето на одржување на собирот на Светскиот економски форум во Давос – кој е отворен во понеделникот, но се одвива виртуелно, поради ковид кризата. Годинешниот извештај ги спротивставува огромните придобивки на најбогатите милијардери со економските загуби што ги претрпе 99% од човештвото.
Некои милијардери имаа особено добра пандемија, дури и според стандардите на ним сличните. Богатството на извршниот директор на Tesla и SpaceX, Илон Маск, се зголеми за околу 1.000%, до сегашната вредност од околу 270 милијарди долари. Ко-основачот на Google, Лери Пејџ и Сергеј Брин се здобија со по 125% зголемување на нивното богатство.
Севкупно, 2.755 милијардери во светот станаа побогати за време на речиси двегодишната пандемија отколку во последните 14 (во голема мера просперитетни) години, соопшти Оксфам.
„Кога Ковид првпат го погоди светот, јас, и многу други наивни, мислевме дека можеби, само можеби, начинот на кој нашите структури беа толку јасно утврдени како неправедни и навистина сурови ќе нѐ разбуди и ќе ни даде нова енергија да размислуваме поинаку за начинот ресурсите се дистрибуираат“, напиша Абигејл Дизни – од семејството Дизни, која долго време се залагаше за даноци на богатство – во предговорот на извештајот. „Всушност, се случи спротивното“.
Студијата ги истакнува економските потешкотии за жените и децата од неразвиениот свет, споредувајќи дека нивното колективно богатство е помало од она што поединечно го уживаат најбогатите 252 мажи во светот. „Првите 1% заробиле речиси 20 пати повеќе од глобалното богатство отколку долните 50% од човештвото“, се наведува во извештајот, додавајќи дека „ако 10-те најбогати луѓе изгубат 99,999% од своето комбинирано богатство, секој од нив сепак би бил побогат. од 99% од светот“.
Важно е да се забележи методологијата на Оксфам овде, бидејќи дел од неа наиде на критики во текот на годините: споредбата меѓу првите 1% и „долните 50% од човештвото“ се заснова на податоците на Credit Suisse кои ги земаат предвид долговите, што значи дека и богат млад човек кој има студентски кредити се смета за релативно сиромашен. Оксфам претходно го бранеше овој начин на гледање на ситуацијата, велејќи дека има многу мала разлика.
Освен тоа, статистиката за супербогатите доаѓа од листата на милијардери на Форбс – во овој случај се користени податоци од крајот на минатиот ноември, а споредбата со богатството на истите луѓе во март 2020 година, земајќи ја предвид инфлацијата – додека податоците за долните 99% од популацијата кои се со полошата состојба доаѓаат од Светска банка.
Оксфам ги повика владите да предвидат справување со нееднаквоста во нивните економски стратегии во кои се планираат мерки за справување со пандемијата, како што се: еднократни даноци за солидарност; прогресивни даноци на капитал и богатство; универзална здравствена заштита и сигурност на приходите; финансирање за справување со климатската криза; инвестирање во правата на жените; и откажување од правилата за интелектуална сопственост за да им се помогне на сиромашните земји да ги вакцинираат своите луѓе.
„Како пристап погоден за 21 век, владите мора да ги насочат своите економски стратегии околу поголема еднаквост. Ова значи многу поголема економска еднаквост – заедно со целите да се стремат кон родова и расна еднаквост – и тоа мора да биде поддржано со експлицитни, временски ограничени и мерливи цели“, се вели во извештајот.
