Аналитика
Во Црна Гора, на крајот на јуни годинава, 58 граѓани имаа повеќе од еден милион евра депозитни сметки кај банките, покажуваат месечните податоци доставени од банките до Централната банка (ЦБЦГ).
„Најголемата сума на депозит на физичко лице е 25,2 милиони евра. Станува збор за нерезидент“, изјавија од ЦБЦГ за дневниот весник Дан, додавајќи дека немаат податоци за идентитетот на тој депонент.
Првите десет штедачи во висина на штедни влогови во банките заедно имаат износ од 66 милиони евра, пренесува порталот bankar.me.
Според податоците на Фондот за заштита на депозити (ФЗД), вкупните депозити на физички и правни лица во Црна Гора изнесуваа 3,38 милијарди евра на крајот на минатата година, што е 96 милиони, или 2,78 проценти помалку отколку во 2019 година.
Подгоричкиот весник наведува и дека 5.097 штедачи имаат меѓу 50 и 100 илјади евра на банкарски сметки, од кои 4.110 се физички лица и 987 се правни лица. Во банките има 3.501 депонент со над 100 илјади евра депозити, од кои 1.887 се граѓани, а 1.614 се правни лица, односно компании.
