Аналитика
Во периодот од 01.01.2021 до 30.06.2021 година, НЛБ Банка АД Скопје работеше согласно усвоената Деловна политика на Банката за 2021-та година, прилагодувајќи го работењето на изменетите пазарни услови поради пролонгираната пандемија од КОВИД-19, која донесе бројни ограничувања во домашната и меѓународната економија, иако во вториот квартал од годината беа направени делумни олабавувања на рестриктивните мерките. Во такви услови, целта на Банката, како една од водечките финансиски институции, е да ја зачува високата ликвидност и солвентност, да го задржи континуитетот и квалитетот на услугите кои ги нуди и да обезбеди финансиска поддршка на клиентите.
И во првата половина од 2021 година, Банката продолжи да остварува позитивни резултати преку реализација на низа активности поврзани со зголемување и подобрување на понудата за клиентите со продукти и платни сервиси. Во овој период, Банката се насочи кон имплементација на стратешките иницијативи во инвестиции во дигитализација и нови технологии, со цел пренасочување на клиентите кон дигиталните канали како поедноставни, поевтини и побезбедни начини на извршување на банкарските трансакции.
Инвестициите во дигитализацијата, подобрениот квалитет на средствата, посветеноста на сите вработени, како и постигнатите извонредни финансиски резултати во изминатата година, во првиот квартал од 2021-та беа наградени од:
-Финансискиот магазин ЕМЕА на Europe Banking Awards 2020 каде НЛБ Банка АД Скопје e избрана за Најдобра банка во C. Македонија.
Заклучно со 30.06.2021 година билансната сума изнесува 100.513.734 илјади МКД, односно се зголеми за 3.968.521 илјади МКД или 4,1% во однос на 31.12.2020 година.
Паричните средства и паричните еквиваленти изнесуваат 18.795.417 илјади МКД и бележат зголемување од 6,9% во однос на 31.12.2020 заради зголеменa состојба на краткорочни депозити во банки.
Кредитите и побарувањата од банки бележат намалување од 502.011 илјади МКД во однос на 31.12.2020. Вкупните Кредити кај небанкарскиот сектор изнесуваат 60.425.121 илјади МКД и бележат зголемување од 4,2% во однос на 31.12.2020. И покрај продолжената ситуација со КОВИД-19 во земјата, кредитирањето кај домаќинствата се зголеми и тоа во сегментот кредити за домување и потрошувачки кредити.
Вложувања во хартии од вредност изнесуваат 17.327.055 илјади МКД и се зголемени за 5,9% во однос на 31.12.2020 како резултат на зголеменото вложување во еврообврзници.
Преземените средства врз основа на ненаплатени побарувања во однос на 31.12.2020 година се намалени за 1,2%. Намалувањето се должи на редовни годишни исправки на вредноста на нефинансиските средства согласно регулативата на НБРСМ.
Вкупните депозити (депозити на комитенти и депозити на банки) изнесуваат 82.442.214 илјади МКД и во однос на 31.12.2020 година се зголемени за 2.662.375 2 илјади МКД или за 3,3%. Зголемувањето на депозитите се должи на нови клиенти од сегментот домаќинства кои се приматели на пензии, плата и други видови примања, нови клиенти кои ги користат физичките и електронските платни сервиси на Банката и нови клиенти од сегментот нефинансиски правни лица, како и на зголемувањето на приливот на средства на сметките на постојните клиенти во домашна и странска валута.
Обврски по кредити се зголемени за 51.153 илјади МКД или за 12,1%.
Субординираните обврски се на исто ниво во однос на 31.12.2020 година.
Акционерскиот капитал и резервите на Банката се зголемени 8,2% и изнесуваат 14.514.091 илјади МКД.
Нето каматните приходи, заклучно со 30.06.2021 година се пониски за 0,3% споредено со истиот период претходната година, при што приходите од камати се пониски за 2,9%, главно поради пониски каматни приходи од секторите нефинансиски правни лица и население, додека расходите по камати се пониски за 20,4% главно поради пониски каматни стапки и преструктурирање на изворите во корист на средства по видување.
Нето приходите од провизии се повисоки за 15,4% споредено со истиот период претходната година, при што приходите од провизии се зголемени за 24,5% како резултат од зголемени приходи од ПОС терминали, повисоки приходи од услуги во платен промет во земјата и повисоки приходи од трансакциски сметки. Расходите за провизии се зголемени за 40,9%, главно поради повисоки расходи за картично работење и повисоки расходи за кеш центар.
Останатите некаматни приходи изнесуваат 672.737 илјади МКД и се повеќекратно зголемени во однос на истиот период претходната година, главно поради остварени повисоки наплати на претходно отпишани побарувања кај нефинансиски правни лица и население како и поради зголемени приходи од курсни разлики. Вкупните приходи од работење изнесуваат 2.714.368 илјади МКД и се повисоки за 24,1% во однос на истиот период претходната година.
Вкупните оперативни трошоци изнесуваат 1.022.316 илјади МКД и се зголемени за 9,6% при што трошоците за вработени се повисоки за 4,5%, трошоците за амортизација се повисоки за 13,5%, останатите расходи од дејност се повисоки за 14,0% во однос на истиот период претходната година.
Заклучно со 30.06.2021, беа издвоени Исправки на вредноста на финансиските средства и вонбилансна изложеност, на нето основа во износ од 435.358 илјади МКД или 4,1% помалку во однос на истиот период претходната година соодветно на структурата и квалитетот на кредитната изложеност. Исправките на вредност на нефинансиски средства изнесуваат 1.472 илјади МКД.
Бруто добивката на Банката заклучно со 30.06.2021 година изнесува 1.255.222 илјади МКД и е зголемена за 60,2% во однос на истиот период претходна година.
Нето добивката на Банката заклучно со 30.06.2021 година изнесува 1.129.700 илјади МКД и е зголемена за 60,2% во однос на истиот период претходна година.
Во првата половина од 2021 година НЛБ Банка нема извршено исплата на дивиденда, во согласност со одлуката на НБРСМ од февруари 2021 година.
