За новата линија „Ковид 4“ ќе може да аплицираат компании со најмалку 30% пад на приходите во 2020-та

Вицепремиерот за економски прашања, Фатмир Битиќи посочи дека индустриското производство е континуирано во пораст последните три месеца, односно во март растот изнесувал 7,6%, во април 46%, а во мај растот на индустриското производство бил 16%. Битиќи додаде дека извозот расте со стапка над 44%, а покриеноста на извозот со увозот изнесува 73,7%. Порастот кај статистичките податоци е доволен знак дека економијата закрепнува, вели вицепремиерот.

Според Битиќи за економски прашања властите се поблиску се до исполнување на ветувањето за 500 евра просечна плата, бидејќи во моментов просечната плата изнесува 28.430 денари и додаде дека сега се вработени 793.121 лице, а стапката на невработеност е стабилна – 16%.

Министерот за финансии Фатмир Бесими, посочи дека приоритети на власта се зголемување на растот на 4-5% на годишно ниво, како и раст на плати за 20-30% на кумулативно ниво на среден рок.

Бесими апелира компаниите да ги искористат средствата што им се овозможени преку новата бескаматна кредитна линија „Ковид 4“, односно вкупно 615 милиони денари, додавајќи дека дури до 50% од кредитот може да се искористи како грант.

Од друга страна, директорот на Развојна банка, Кире Наумов нагласи дека за новата линија „Ковид 4“ ќе може да аплицираат малите, микро и средни компании што имале најмалку 30% пад на приходите во 2020 година во однос на 2019 година. Тој додаде дека ќе може да се пријават компании од 23 шифри на дејност, а тука влегуваат оние од областа на превозот, угостителството, ивент индустријата, како и занаетчиите и приватните здравствени установи. На конкурсот нема да може да се пријават единствено фирмите кои користеле поддршка за плати за февруари и март од петтиот пакет мерки .

-Максималниот износ на кредитот е 30 илјади евра, а минимален изнесува три илјади евра. Рокот на отплата е до 42 месеца, со грејс период од 12 месеци, изјави Наумов.

Тој кажа дека ќе може да се аплицира започнувајќи од 15 јули.

Што се однесува до можноста за грант ако за 10% се зголемил приходот, во тој случај 30% од кредитот ќе може да се трансформира во грант, а ако пораснал бројот на вработени, тогаш 20% од кредитотисто така ќе може да бидат грант.