Аналитика
Француската влада претстави предлог-буџет за 2021 година, со кој се предвидува да се вметнат 42 милијарди евра поддршка за економијата исцрпена од пандемијата.
„Убедени сме дека Франција може брзо да закрепне“, рече министерот за финансии Бруно Ле Мер по седницата на владата, пренесува АП.
Проценето е дека француската економија годинава ќе падне за 10 проценти, што ќе биде најголема рецесија од Втората светска војна.
На почетокот на овој месец, центристичката влада на францускиот претседател Емануел Макрон претстави план за закрепнување вреден 100 милијарди евра, чија цел е создавање нови работни места и спасување на сопнати бизниси.
„Имаме намера да распределиме 42 милијарди евра од овие средства до крајот на 2021 година, односно скоро половина од планираните 100 милијарди, со цел да постигнеме брзи економски резултати“, рече Ле Мер.
Владата се надева на економски раст од 8,0 проценти следната година, што ќе биде поттикнат од планот за закрепнување. Овој масовен план за обновување вклучува средства за враќање на производството на медицинска опрема во француските фабрики, производство на енергија од водород, помагање на музеи и кина, обука на млади луѓе за работните места во 21 век и вработување дополнителен персонал во канцелариите за невработеност.
Трошењето пари за заштеда на работни места и компании е `добра инвестиција`, изјави Ле Мер.
Јавниот долг на Франција се очекува да порасне нешто помалку од 100 проценти од бруто домашниот производ на 117,5 проценти оваа година, според владините проекции.
Ле Мер вети дека долгот ќе се намали преку закрепнување на растот, намалување на јавната потрошувачка и големи реформи, вклучително и промена на пензискиот систем во земјата.
