ТРАМВАИТЕ И АВТОБУСИТЕ ОСТАНАА ВО ДЕПОАТА: Загреб денес остана без градскиот превоз, контејнерите се празнат само пред болниците и училиштата

Работниците загребските јавни комунални претпријатија ZET и „Загреб Холдинг“ стапија во штрајк утрово, на 28 септември, во 3:30 часот, откако синдикатите и раководството на градските претпријатија не успеаја да постигнат договор за нови колективни договори.

Штрајкот би можел да предизвика сериозни прекини во јавниот превоз, како и во комуналните услуги во Загреб.

Главниот спор меѓу синдикатите и работодавачот се однесува на зголемувањето на платите и склучувањето нови колективни договори. Синдикатите на ZET бараат зголемување на основната плата од 13 отсто – откако го намалија првичниот услов од 19 отсто – додека синдикатите на „Загреб Холдинг“ бараат зголемување од 12 отсто.

Раководството на градските претпријатија понуди зголемување на основната плата од 4,5 отсто.

Претставниците на синдикатите изјавуваат дека нивната цел не била да започнат штрајк и нагласуваат дека договорот сè уште е можен.

Дражен Јовиќ, претседател на Синдикатот на работниците во сообраќајот и комуналните дејности на Хрватска, во понеделникот наутро им изјави на новинарите пред депото „Ремиза“ на ZET дека синдикатите дополнително ги намалиле своите барања.

Тој изјави дека се подготвени да продолжат со разговорите, но очекуваат преговорите да се водат со добра волја, пренесуваат хрватските медиуми.

Трамваите и автобусите на ZET утрово не излегоа од депоата, што ќе влијае на функционирањето на јавниот превоз во Загреб.

Вработените во „Чистоќа“ (градското претпријатие за управување со отпад) исто така започнаа штрајк, собирајќи се пред седиштето на претпријатието. На влезот беше истакнат натпис „Штрајк“. Сепак, дел од работата ќе се извршува поради потребата да се обезбедат неопходните комунални услуги.

Претседателот на Синдикатот на комуналните работници и возачи во службата за чистота, Мумин Хоџиќ, изјави дека 20 камиони ќе излезат на терен. „Да, станува збор за неопходно собирање на отпадот; тоа ќе се врши пред болниците, домовите за стари лица, градинките, училиштата… Сакаме да се однесуваме одговорно додека сето ова не заврши“, рече Хоџиќ.

Возачите на „Чистоќа“ кои работеле во ноќната смена ја завршиле работата според планот, потврди Хоџиќ. Тој додаде дека вработените кои сакаат да работат ќе можат тоа и да го сторат.

Со тоа, синдикатите и раководството на градските претпријатија сè уште имаат можност да ги продолжат преговорите, додека граѓаните на Загреб уште од утринските часови можат да очекуваат прекини во јавниот превоз и во одредени комунални услуги.