Аналитика
Европската мапа на евтини летови добива уште еден играч, а неговата почетна точка не е Лондон, Париз или некој од големите туристички центри. Новата нискобуџетна авиокомпанија Fly2Galicia ќе се обиде да ја стави шпанска Галисија многу поблиску до остатокот од Европа – со цени на билетите што почнуваат од само 21,50 евра во еден правец.
Првите летови се најавени за 1 декември 2026 година, а базата на новиот авиопревозник ќе биде аеродромот „Росалија де Кастро“ во Сантијаго де Компостела, градот кој за милиони луѓе е познат како крајна точка на прочуениот аџилак Камино де Сантијаго.
Од северозападна Шпанија Fly2Galicia на почеток ќе нуди директни врски со осум дестинации – Аликанте, Сарагоса и Гранада во Шпанија, како и Брисел, Минхен, Милано-Малпенса, Венеција и Прага. Според објавените планови, мрежата треба да има 17 неделни поаѓања, што за Галиција значи значително подобрување на директната воздушна поврзаност со големите европски центри.
Но, зад новото име на пазарот засега нема да стои сопствена флота. Почетните летови се планирани преку ACMI, односно таканаречен „wet lease“ аранжман, при кој авиокомпанијата користи авион и оперативни услуги од друг превозник. Според објавените информации, станува збор за Airbus A320 управуван од романскиот превозник FLYYO.
Таквиот модел не е необичен во авиоиндустријата, особено кога станува збор за нови компании. Наместо уште на почеток да инвестираат огромни суми во сопствени авиони и целосна оперативна инфраструктура, стартап-превозниците можат прво да ја тестираат побарувачката, да изградат мрежа и да видат кои линии имаат потенцијал.
А Fly2Galicia очигледно сака да привлече внимание токму со она што најмногу го забележуваат патниците – цената.
Продажбата на билетите започна на 18 август, а најевтините еднонасочни летови се нудат од 21,50 евра. Најповолни засега се домашните линии од Сантијаго де Компостела кон Аликанте, Сарагоса и Гранада.
Колку ниско може да оди сметката покажува примерот со повратен билет меѓу Аликанте и Сантијаго де Компостела. За одредени датуми во декември, патувањето во двата правци може да чини околу 40,50 евра со најосновната тарифа „Economy Go“, во која е вклучен и кабински багаж до осум килограми.
Сепак, Fly2Galicia не сака да остане само во сегментот на најевтини билети. Компанијата најавува уште три тарифни категории – Economy Plus, Economy Premium и Business Premium. Со повисоката цена доаѓаат дополнителен багаж, подобри седишта, храна и пијалаци, а највисоката класа треба да понуди и пристап до аеродромски салони, можност за откажување на билетот и празно средно седиште.
Во подготовка е и програма за лојалност – Fly2Galicia Miles Programme, преку која патниците ќе собираат поени што подоцна ќе можат да ги користат за нови летови.
Зад целата приказна, сепак, стои поголема амбиција од продажба на билети за дваесетина евра. Fly2Galicia се позиционира како одговор на долгогодишниот проблем со ограничените директни врски на Галиција со европските градови. Особено значајна е позицијата на Сантијаго де Компостела, чија туристичка привлечност расте паралелно со популарноста на Камино де Сантијаго.
Бројот на луѓе што ги минуваат аџилачките патеки кон градот во изминатите две децении драматично се зголеми и надмина половина милион годишно, создавајќи сè поголема потреба од лесни и евтини начини за пристигнување и заминување од регионот.
Токму тука Fly2Galicia гледа простор за себе – да ги спои туристите, локалното население и европските метрополи преку модел на ниски цени и директни линии.
Доколку планот успее, од декември една од најпознатите аџилачки и туристички области во Шпанија би можела да стане и една од поинтересните нови точки на европската нискобуџетна авијација. А со стартни цени од само 21,50 евра, новиот превозник очигледно има намера прво да ја освои Европа преку паричникот на патниците.
