Аналитика
Македонска берза во текот на август организира бесплатни индивидуални консултации за компании заинтересирани за можностите за финансирање преку пазарот на капитал. Компаниите ќе можат директно да се информираат за IPO на акции, издавање корпоративни обврзници и за другите можности за прибирање капитал од инвеститорите.
Консултациите се поврзани и со Проектот за поттикнување и подготовка на македонски компании за пазарно финансирање, кој Македонска берза го реализира во соработка со Европската банка за обнова и развој – ЕБОР. Во проектот ќе бидат избрани најмногу 10 домашни компании што имаат конкретен интерес во наредниот период да го користат македонскиот пазар на капитал како извор на финансирање.
Избраните компании ќе добијат индивидуална проценка на нивната подготвеност за излез на пазарот на капитал, анализа на финансиската состојба, корпоративното управување, транспарентноста и пазарното позиционирање, како и препораки за следните чекори. Консултантската поддршка ја обезбедуваат експерти од PwC Северна Македонија и PwC Хрватска. ЕБОР ќе покрие 60 до 70 проценти од трошоците на проектот, додека учеството на избраните компании нема да надмине 4.000 евра по компанија.
Заинтересираните компании можат да закажат бесплатна индивидуална консултација на +389 2 3122 055 или на [email protected]. Крајниот рок за пријавување во проектот е 1 септември 2026 година.
Повеќе детали за условите, начинот на пријавување и поддршката што ја добиваат компаниите може да се прочитаат на јавниот повик на Македонска берза.
