ГЕРМАНСКАТА ЕКОНОМИЈА МЕЃУ ДВЕ СИЛИ: Кина го презеде водството

По само една година пауза, Кина повторно е најголемиот трговски партнер на Германија. Според најновите податоци на Федералниот завод за статистика (Дестатис), вкупната размена меѓу двете економии во 2025 година достигнала 251,8 милијарди евра, што претставува раст од 2,1% во однос на претходната година. Со тоа, Пекинг повторно го презеде водството од САД, кои беа на првото место во 2024 година.

Кина и претходно ја држеше позицијата најважен германски трговски партнер, од 2016 до 2023 година, а најновите бројки покажуваат дека економската поврзаност останува силна, и покрај геополитичките тензии и растечките повици за диверзификација на синџирите на снабдување.

Структурата на трговијата открива јасна асиметрија. Германија минатата година увезла стоки од Кина во вредност од 170,6 милијарди евра, што е зголемување од 8,8%. Најголем дел од увозот се однесува на опрема за обработка на податоци, електрична опрема и машини. Од друга страна, германскиот извоз во Кина изнесувал 81,3 милијарди евра, што е пад од 9,7% на годишно ниво.

САД остануваат втор најголем трговски партнер на Германија, со вкупна размена од 240,5 милијарди евра, но со пад од 5%. Германскиот извоз во САД се намалил за 9,4% и достигнал 146,2 милијарди евра. Особено погоден бил автомобилскиот сектор, каде што е забележан пад од 17,8% кај автомобилите и автоделовите.

Според аналитичарите, падот на извозот во САД е поврзан со царинските мерки воведени од администрацијата на претседателот Доналд Трамп, кои дополнително ја усложнија трговската размена. И покрај тоа, САД и натаму остануваат најважниот поединечен извозен пазар за германските производи.

Во исто време, економистите забележуваат дека трговските бариери меѓу Кина и САД имаат индиректен ефект врз Европа. Поради повисоките царини за кинеските производи во САД, дел од тие стоки се пренасочуваат кон европскиот пазар, вклучително и Германија. Овој тренд, според експертите, може дополнително да ја засили конкуренцијата на германскиот пазар.

Од бизнис-заедницата стигнуваат предупредувања дека глобалната средина станува сè понепредвидлива. Протекционизмот, структурните нерамнотежи и забавувањето на кинеската побарувачка создаваат притисок врз германските извозници. Дел од нив повикуваат на поголема диверзификација на пазарите и зајакнување на конкурентноста, наместо потпирање на неколку клучни партнери.

Во ваков контекст, најавената посета на германскиот канцелар Фридрих Мерц на Кина добива дополнителна тежина. Освен политичките пораки, во фокусот ќе биде и прашањето како да се одржи економската рамнотежа меѓу двата најголеми светски економски блока, во време кога трговијата сè повеќе станува дел од пошироката геополитичка стратегија.

(Фото: Unsplash)