Аналитика
Во време кога детската игра сè почесто се сели на екрани, Lego се обидува да направи чекор понатаму, спојувајќи ја класичната пластична коцка со дигиталната технологија. Данскиот производител на играчки на саемот CES 2026 во Лас Вегас ги претстави таканаречените „Паметни коцки“, нова генерација Лего коцки што реагираат на движење, светат и испуштаат звуци. Иако компанијата ги опишува како најголема иновација во последните децении, реакциите од експертите за детска игра се поделени.
Новата платформа, наречена Smart Play, внесува електронски компоненти во препознатливите пластични блокови, со цел да се збогати искуството на игра преку интеракција во реално време. Од Лего најавуваат дека производите ќе бидат пуштени во продажба во март, заедно со нов сет од франшизата „Војна на ѕвездите“, и веруваат дека токму оваа технологија ќе го дефинира идниот развој на брендот.
Сепак, не сите се уверени дека ваквиот пристап е чекор во вистинската насока. Џош Голин, извршен директор на организацијата за благосостојба на децата Fairplay, предупредува дека „Паметните коцки“ може да го нарушат она што со децении го правеше Лего уникатен, поттикнувањето на детската имагинација без однапред зададени реакции. Според него, децата не им требаат вградени звуци и светла за да создаваат приказни, бидејќи тие веќе го прават тоа со сопствената фантазија.
Сличен став изнесе и професорот Ендру Манчес од Универзитетот во Единбург, кој вели дека вредноста на Лего лежи во слободата за градење, рушење и повторно создавање бескрајни светови. Сепак, тој признава дека обидот на Лего да ја поврзе физичката и дигиталната игра одговара на начинот на кој денешните деца природно комуницираат со технологијата, под услов таа да не ја замени креативноста, туку да ја надополни.
Од компанијата, пак, велат дека токму тоа им е целта. Главната директорка за производи и маркетинг, Џулија Голдин, претходно изјави дека Лего не го гледа дигиталниот свет како закана, туку како можност за проширување на физичката игра. Според неа, новата линија на производи беспрекорно ја комбинира интерактивноста со традиционалното градење.
Самата „паметна тула“, со стандардни димензии 2×4, содржи сензори за движење и позиција, светла, мал синтетизатор на звук, акцелерометар и специјално дизајниран силиконски чип. Таа е наменета да работи заедно со паметни минифигури и плочки со дигитални ознаки, кои меѓусебно комуницираат преку безжичен систем развиен од Лего и предизвикуваат различни реакции за време на играта.
За време на демонстрациите на CES, новинарите видоа како Лего торта „препознава“ кога се дуваат свеќите и пушта роденденска песна, додека хеликоптер испушта звуци при движење и светнува црвено кога ќе падне. Според Том Доналдсон, раководител на Лего лабораторијата за креативна игра, технологијата е дизајнирана да реагира на постапките на децата и да ги инспирира да продолжат со играта, наместо да ја води наместо нив.
Иако намалувањето на цената и големината на електронските компоненти им овозможи на производителите сè полесно да вградуваат технологија во играчките, експертите предупредуваат дека со тоа доаѓаат и нови ризици. Прашањата за безбедноста, приватноста и влијанието врз секојдневниот развој на децата остануваат отворени, особено кај паметните играчки што во иднина би можеле да користат и вештачка интелигенција.
Ова не е прв обид на Лего да експериментира со дигитални искуства. Во последната деценија компанијата лансираше апликации со зголемена реалност и соработуваше со брендови како Nintendo и Epic Games, обидувајќи се да им се приближи на генерациите што растат со видео игри. Извршниот директор Нилс Б. Кристијансен во годишниот извештај за 2024 година нагласи дека дигиталната технологија останува стратешка насока за компанијата, што укажува дека „Паметните тули“ се само почеток на подолг процес на трансформација.
(Фото: Unsplash)
