Аналитика
Шифрата MPT е доминантна кога ќе се отвори веб-страницата на Македонска берза во делот преглед за блок-трансакции. Во месец и половина се забележани 27 блок-трансакции со акциите на Макпетрол, од кои последните две во петокот. Од втори октомври, заклучно со 14 ноември, вкупно 2.109 акции станале сопственост на познат(и) купувач(и). Нивната заедничка вредност е 262,8 милиони денари или околу 4,3 милиони евра.
Последните два блока регистрирани на крајот од работната седмица заеднички податок е цената од 116 илјади денари за акција. Во едната трансакција предмет на купопродажба лиле 148, а во другата 53 акции. Оттаму и нивната вкупна вредност од 17.168.000 денари (279,1 илјада евра), односно 6.148.000 денари (околу 100 илјади евра).
Всушност, таа цена е присутна во најголемиот дел од блок-трансакциите, вкупно 23. Преостанатите четири се реализирани со единечна цена од 117 илјади денари за акција.
И според бројноста на акциите и според вредноста, најголем е блокот што датира од 9. октомври. Тогаш купените 300 акции, секоја по цена од 117 илјади денари, биле платени со износ од 570,7 илјади евра.
Од друга страна, две трансакции се со по 20 акции (од 15 и 29 октомври), а биле заокружени со промет од по 37,7 илјади евра. Овде цената била 116 илјади денари.
Не може да се тврди дека единствениот купувач е Оикло и покрај тоа што од Макпетрол често ја информираат инвеститорската јавност дека командитното друштво го зголемува сопственичкиот удел. Во последната објава со таква содржина (10 ноември) е наведено дека акционерот Оилко КДА, по стекнатите 383 обични акции поседува 26,94 отсто од капиталот. Тоа е еднакво на 30.273 акции.
Акциите на Макпетрол постојано се во фокусот на инвеститорите. Некои од нив коментираат и дека акцијата на нафтениот дистрибутер ја нема вистинската цена со оглед на профилот, големината и можностите на бизнисот. За што потврда се и финансиските резултати, а последниот е: за деветте месеци од годинава добивката е 14,9 милиони евра.
