Аналитика
Соединетите Американски држави категорично го отфрлија барањето на францускиот политичар Рафаел Глуксман Статуата на слободата во њујоршкото пристаниште да ѝ се врати на Франција, отфрлајќи ги неговите забелешки како неоправдани и политички мотивирани.
Глуксман, политичар од левиот центар, неодамна изјави дека Франција треба да ја врати иконската статуа, тврдејќи дека САД повеќе не ги поддржуваат вредностите што ја инспирираа Франција да го подари споменикот.Неговите изјави се сметаат за директна критика на политиката на американскиот претседател Доналд Трамп, особено во однос на научната слобода и меѓународните односи.
„Вратете ни ја Статуата на слободата… Ќе им кажеме на Американците, кои избраа да застанат на страната на тираните и отпуштените истражувачи поради барање научна слобода – „Вратете ни ја Статуата на слободата“, рече Глуксман. „Ви ја подаривме, но очигледно ја презирате. Така ќе биде подобро овде дома“.
Изјавата предизвика остар одговор од Белата куќа, при што прес-секретарката Каролин Левит порача дека Франција ќе „зборува германски“ без помошта на САД во Втората светска војна.
„Апсолутно не. И мојот совет до тој неименуван француски политичар од ниско ниво би бил да се потсети дека Французите во моментов не зборуваат германски само поради Соединетите Американски Држави. Затоа треба да ѝ бидат многу благодарни на нашата голема земја“, рече таа.
Статуата на слободата беше поставена во пристаништето Њујорк пред 138 години, на 28 октомври 1886 година, за да ја одбележи 100-годишнината од Американската декларација за независност. Создадена од францускиот уметник Огист Бартолди, скулптурата, висока 46 метри беше подарок од народот на Франција до Соединетите држави, претставувајќи ги заедничките вредности на слободата и демократијата. Во Париз има помала реплика на статуата на остров во Сена.
Забелешките на Глуксман во голема мера се гледаат како симболична политичка изјава, а не како вистинско барање за нејзино враќање. Познат како гласен критичар на Трамп, Глуксман силно се спротивстави на промената на американскиот претседател во надворешната политика, особено во однос на војната во Украина.
Тој, исто така, ги осуди лидерите на екстремната десница во Франција, обвинувајќи ги дека се „клуб на обожаватели“ на Трамп и милијардерот Илон Маск.
