НИШТО ОД ПОНУДАТА: Акционерите на Стопанска банка Битола и рекоа „не“ на Комерцијална банка

Пропадна понудата на Комерцијална банка за целосно преземање на битолската Стопанска банка. На повикот за продажба на акциите по цена од 3.200 денари, одговориле само 149 акционери, во чија сопственост не се ниту половина од вкупниот број акции со право на глас.

„Понудата за преземање беше прифатена од 149 (сто четириесет и девет) сопственици на обични акции со право на глас, кои поседуваат вкупно 176.154 обични акции, односно 45,0548% од сите акции со право на глас издадени од Стопанска банка АД Битола“, пишува во известувањето за исходот на понудата, што е објавено на веб-страницата на Комерцијална банказа преземање на Стопанска банка АД Битола, а ззад кое стои Управниот одбор.

Познато е, понудата за преземање се однесуваше на сите 390.977 обични акции со право на глас издадени од Стопанска банка Битола. А, прагот на успешност беше утврден на 261.956 акции, што претставува мнозинство од 67 проценти плус една акција од вкупниот број. За таа намена Комефцијална издвои 1.251.126.400 денари или 20,3 милиони евра.

„Со оглед на тоа што прагот на успешност не е постигнат, понудата за преземање на Стопанска банка АД Битола од страна на Комерцијална банка АД Скопје се смета за неуспешна. Причина за неуспешност е тоа што не се изјаснија позитивно по однос на понудата на Банката доволен број акционери кои поседуваат обични акции со право на глас, односно во законски утврдениот рок до 22.09.2024 година не дадоа Изјава за прифаќање на понуда за откуп по цена од 3.200 денари по акција“, посочуваат од Комерцијална банка.

Незвесноста на исходот беше присутна од самиот почеток по официјално објавената понуда, кога почнаа и првите негодувања од цената за акција, па за тоа што ќе биде со дел од вработените. Додека од УО на битолската банка беше дадена јавна согласност, синдикатот во име на вработените побараа прецизно да се утврдат условите кои го засегаат колективот.

Во меѓувреме јавна реакција имаше и од „Пелисерка“ како еден од поголемите акционери, со повик да не се продаваат акциите. Со образложение „финансиската кондиција на Стопанска банка АД Битола е исклучително поволна и понудената вредност од страна на Комерцијална банка за откуп на акциите не ја дава реалната слика за моменталниот, но и за идниот потенцијал на банката“.

Исто така, се постави и прашањето – каков ќар ќе имаат акционерите на Комерцијална од таа трансакција, доколку се реализира. Стануваше збор за седум милиони евра, износ наведен во самата понуда. Односно, тоа беше предвидено како ефект од позитивната разлика што би произлегла од трансакцијата, во износ од околу 440 милиони денари. Пари кои ќе претставуваа тековна добивка за 2025 година.

Сепак, ништо од сето тоа, бидејќи последниот збор го имаа акционерите на Стопанска банка Битола, на кои Комерцијална банка АД Скопје „им посакува успех во понатамошното работење“.

М.А.