„МАКСТИЛ“ ЈА СТОПИ ДОБИВКАТА за 17 отсто од лани

Податоците на финансискиот извештај објавен на Македонска берза за првата половина од годината покажуваат дека добивката пред оданочување на „Макстил“ е 169 милиони денари и бележи 17 отсто намалување во споредба со остварената во првото полугодие од 2023, додека нето добивката изнесува 151 милиони денари, 18 отсто пониска од остварената за истиот период во минатата година. Намалувањето на добивката главно се должи на намалената реализација кај продажбите по договор за преработка и зголемените трошоци за амортизација заради активираните инвестиции во изминатиот период.

Од „Макстил“ велат дека поради високата инфлација, високите трошоци, како и зголемените геополитички несигурности и силно монетарно затегнување, растот на глобалната побарувачка на челик останува слаб. Состојбата на пазарот во ЕУ може да се каже дека е стабилна, нивото на нарачки е високо, а од почетокот на годината е забележан благ пад на цените на лимовите, велат од компанијата.

„Макстил“, како многу значаен регионален производител на толовалани дебели лимови ги следи глобалните трендови, постојано врши прилагодување на сите деловни функции од работењето и успева да ја следи тековната побарувачка на челик.

Во првата половина од годината се остварени приходи од работење во износ од 4,06 милијарди денари, од кои приходите од продажби како носечка ставка во структурата на вкупните приходи учествуваат со дури 99%. Споредено со истиот период од 2023 остварените приходи од работењето (4,23 милијарди) се пониски за 5%. Намалените приходи воглавно се должат на количинско намалување на продажбите по договор за преработка.

Во првите шест месеци од работењето остварените расходи изнесуваа 3,61 милијарди денари, од кои трошоците за производство се носечка ставка и во структурата на вкупните расходи учествуваат со 91%. Споредено со истиот период во 2023 година остварените расходи од работењето (3,78 милијарди денари) се пониски за 5%.