„Реплек“ амбициозен и во плановите и во делувањето: Приходите од фармација 13,6 милиони евра

Фармацијата е сегментот на кој типува „Реплек“. Од таму ги црпи приходите кои се во тренд на зголемување. Од таму произлегува и заработката.

Од јануари до јуни, работната активност на Групацијата и обезбедила консолидирана оперативна добивка од 87.784 илјади денари или 1,43 милиони евра. Дека оди на подобро, покажува четирипроцентниот раст во споредба со истиот период од минатата година.

Целосно е реализиран предвидениот план за продажба, информираат од „Реплек“. Уште повеќе, приходите што ги носи продажбата во сегментот фармација се зголемени за 20,5 проценти.

А, за 20 насто се повисоки вкупните оперативни приходи, кои во првиот дел од годинава надминаат 865 милиони денари, односно околу 14 милиони евра. Придонесот на фармација е 13,6 милиони евра.

На домашниот пазар има значителен напредок на проджбата, за солидни 46 насто. Тука е запишан износ од 2,97 милиони евра. Раст од 15 проценти е забележан на странските пазари, при што е достигната вредност од 10,6 милиони евра.

Производите на „Реплек“ се присутни во ЗНД, во Африка и Блискиот Исток, во Југоисточна Европа, Југоисточна Азија и во земјите од ЕУ. Во првото полугодие го направи првиот извозен пробив во Туркменистан. „Амбициозните планови за овој пазар се поддржани од очекувањата за приходи од продажба во висина од 1 милион евра во текот на 2024 година“, велат од компанијата.

Паралелно со ова, се зголемуваат и инвестициите, кои во шестте месеци се поместиле на ниво од 5,6 милиони евра. Тоа претставува значително зголемување во однос на истиот период минатата година и претставува показател за посветеноста во реализацијата на амбициозниот нов инвестициски циклус на компанијата со кој се предвидува нејзина целосна модернизација, посочуваат од „Реплек“.

„Позитивните резултати кои продолжуваме да ги остваруваме и во првата половина од оваа година се показател дека нашата стратегија за долгорочен одржлив развој на Реплек и деловните планови кои произлегуваат од неа се добро поставени и димензионирани. Главната цел на досегашните промени и вложувања што ги направивме, како и на оние кои допрва ќе се случуваат, е да генерираме дополнителна вредност за сите, почнувајќи од потрошувачите, нашите вработени, акционерите, деловните партнери и заедницата. Затоа и натаму остануваме посветени на натамошната целокупна технолошка модернизација на Реплек, на иновациите во проширување на нашето портфолио на производи и на јакнењето на нашите пазарни позиции и перформанси, како и на вложувањата кои треба да ја гарантираат благосостојбата на нашите вработени“, изјави главниот извршен директор на „Реплек“ АД, Душан Пецовски.

Оттаму и очекувањата дека оваа фармацевтска компанија до крајот на годинава ќе регистрира раст кај приходите од продажба за 24 насто. А, реалноста ќе ги потврди проекциите за добивка од минимум 3,5 милиони евра.

Притоа, „Реплек“ ќе продолжи да се развива преку вложувања за зголемување на производствените капацитети, во дигитализација и преземање на права за застапништво.