ВИЦЕПРЕМИЕРОТ НАЈАВИ: Од четврток пониски цени на тестенините и млечните производи

Дали ќе замрзнат цените на шеќерот, јајцата и оризот, ќе се знае наскоро, бидејќи при крај се анализите што се прават за да се дојде до конечната проценка, најави вицепремиерот за економски прашања, Фатмир Битиќи. Согледувањата ги прави ресорното Министерство за економија, а потоа за нив ќе се дискутира и во Владата.

Засега намалувањето е многу мало, оцени Битиќи за состојбата со цените на тестените и млечните производи, кои од четврток би требало да се пониски за десето до 15 проценти.„Намалувањето е многу мало, но реакциите се позитивни дека на 16 март сите веќе ќе имаат намалени цени, според она што беше дефинирано. Секако, на шеснаесетти производите ќе стигнат до цената која е зададена, не гледаме дека нема волја од другата страна“, одговори Битиќи на новинарско прашање, по средбата со претставниците на германското стопанство.

Одлуките за замрзнување на цените не се носат за да се наштети некому, туку за доброто на сите граѓани, посочи тој. „Не сакаме да нанесеме штета со воведување мерки од денеска за утре. Затоа дадовме временски период од скоро една недела, за компаниите да потрошат одредени залихи и да почнат со замрзнати, пониски цени. Секоја мерка се носи за доброто на граѓаните, притоа не сакаме да нанесеме штета никому,затоа и заеднички настапуваме во периодот на криза, за да излеземе од неа“, дециден е Битиќи.