Аналитика
На државите на ЕУ кои користат руски гас би можело да им биде исклучено снабдувањето со гас откако Москва го одреди во петокот краен рок за плаќање во руската валута. Москва го одреди рокот до петок за плаќање гас да се врши во рубљи. Германија ова го нарече „уцена“ и инсистира да се плаќа во евра или долари.
Рускиот претседател Владимир Путин во четвртокот потпиша декрет со кој се предвидува дека купувачите мора да плаќаат во рубљи, што Москва се закани дека ќе го направи минатата недела. Москва се обиде да ја искористи својата позиција како извозник на енергија во обид да се спротивстави на западните санкции поради нејзината инвазија на Украина. Земјите од Европската унија воведоа широк опсег на санкции, но не постигнаа енергетско ембарго поради нивната зависност од рускиот гас, јавува Дојче Веле.
Што рекоа руските власти?
„Доколку таквите плаќања не се извршат, ќе го сметаме ова за прекршување на обврските од страна на нашите купувачи“, рече Путин. Русија тогаш ќе ги прекине постоечките договори. „Тие мора да отворат сметки во рубљата во руските банки. Токму од овие сметки ќе се вршат плаќања за испорачаниот гас од утре“, рече Путин во четвртокот.
Минатата недела Путин изјави дека таквите плаќања ќе бидат задолжителни за „непријателските“ земји, вклучително и оние што ја сочинуваат Европската унија.„Постапките на ЕУ нема да останат неодговорени… неодговорните санкции од Брисел веќе негативно влијаат на секојдневниот живот на обичните Европејци“, изјави високиот функционер на руското Министерство за надворешни работи Николај Кобринец за државната новинска агенција РИА.
Одговорот на Западот
Германија инсистираше на тоа дека ќе плаќа за гасот во евра или долари како што е предвидено во постоечките договори и барањето на Москва да плати во рубљи го нарече „уцена“. Пред руската инвазија на Украина, Германија увезуваше 55% од своите испораки на гас од Русија. Францускиот министер за економија рече дека Берлин и Париз се подготвуваат за сценарио кога Русија ги затвора славините за гас.
На почетокот на март, Европската унија претстави предлог за намалување на зависноста од рускиот гас со барање зголемено снабдување од САД и Катар и со проширување на чистата енергија.
Во четвртокот, американскиот претседател Џо Бајден објави дека Соединетите Држави ќе ослободуваат по еден милион барели нафта дневно од нафтените резерви на нацијата во текот на шест месеци, со цел да се борат против растот на глобалните цени на гасот.
