Аналитика
Со 31 март 2022 година, Банката оствари позитивен финансиски резултат од 10,04 милиони денари, којшто е значајно подобар во однос на истиот период минатата година.
Работењето на Банката во првото тримесечје од 2022 година се одвива во услови на благо закрепнување на економијата, охрабрено со масовната имунизација на населението, но во присуство на ограничувачките фактори поврзани со нови бранови на пандемијата ковид–19 и со растечките геополитички ризици и ескалирачката воена тензија во Украина. Европа се соочува со енергетска, безбедносна и бегалско-хуманитарна криза, на која се надоврзува опасноста од недостиг на храна. Воената тензија најавува забавен раст на економиите во Европа, а забавувањето на германската економија, како наш најголем трговски партнер, означува неповолности врз растот на македонската економија.
Во вакви околности, Банката забележа пораст на вкупната актива/пасива од 1,5% во однос на крајот од минатата година и остварување на поставениот план од 97.3%.
Позицијата вложувања во хартии од вредност е пониска во однос на крајот на претходната година за 5% и пониска од планот за 11,5%. Паричните средства и парични еквиваленти се намалени за 12,2% и пониски од планот за 6%.
Во првото тримесечје на 2022 година, евидентиран е пораст на кредити на и побарувања од други комитенти за 0,9% во однос на крајот на годината, при што планот е исполнет со 99%. Порастот во најголем дел е остварен при одобрување кредити на физички лица.
Позицијата останати побарувања бележи пораст во однос на крајот од минатата година и во однос на планот за 30,2%. Оваа позиција во Билансот на состојба е со висок износ како резултат на евидентираната авансна исплата на пензиите на крајот од месецот.
Позициите нематеријални средства и недвижности и опрема бележат пад во однос на крајот на минатата година, кој се должи на континуираната амортизација на овие средства.
Позицијата депозити на други коминтенти бележи благо опаѓање во однос на крајот од годината од 1,8%, но и во однос на планот за 3,3% што се должи на растечката инфлација во економијата и повлекување на дел од депозитната база од банките.
Благото намалување на изворите на средства доведе до намалување на расходите за камати за 3,6% во првото тримесечје од 2022 година во однос на истиот период минатата година. Остварените расходи за камати во 2022 година, во однос на планираните, се пониски за 3,3%.
Наспроти нагорниот континуитет на кредитна активност во сегментот население, во услови на висока конкуренција, Банката оствари пониски приходи од камати за 3.1% во споредба со истиот период минатата година. Остварените приходи од камати со првото тримесечје на 2022 година, во однос на планираните, се пониски за 4,4%. Во услови на континуиран тренд на намалување на активните каматни стапки, но зголемени каматни стапки на државните записи, поради растечката инфлација во економијата, при намалени расходи од камати, Банката оствари повисок нето-каматен приход во однос на истот период претходната година од 2,9%.
Во првото тримесечје на 2022 година, забележан е пораст на приходите од провизии за 1,3% во однос на истиот период минатата година и исполнување на планот од 98,5%. Тој пораст придонесе кон пораст на позицијата нето-приходи од провизии и надомести за 2,3%, во однос на истиот период претходната година, додека планот е надминат за 2,7%.
Нема разлики во однос на позицијата трошоци за вработените, во однос на истиот период претходната година. Оваа позиција отстапува во однос на планот, бидејќи планираните дополнителни вработувања се одложени за следните месеци.
Позицијата останати расходи од дејноста бележи пораст од 3.6% во однос на истиот период минатата година, но во однос на планот остварени се пониски останати расходи од дејноста за 7,4%.
Останатите приходи од дејноста се 73,4% повисоки во однос на претходната 2021 година и во однос на планираните за 30,6%.
Со првото тримесечје на 2022 година, реализирани се пониски нето–приходи од курсни разлики за 82,2% во однос на минатата година.
Расходите за амортизација бележат пад од 7,2% во однос на истиот период минатата година и 4,8% во однос на планираните, како резултат на одложени набавки на основни средства.
Со 31 март 2022 година, евидентно е намалување на издвоените резервации за кредитните изложености на физичките лица, при што е издвоена исправка на вредноста на финансиските средства и посебна резерва за вонбилансната изложеност, на нето-основа во износ од 2,6 милиони денари, односно забележано е подобрување на оваа позиција за 7.2 милиони денари во однос на истиот период минатата година.
Заклучно со првото тримесечје на 2022 година, Банката не исплати дивиденда.
Вложувања или продажба на материјални средства (недвижности, постројки и опрема) или значителен отпис (поголем од 30% од вредноста на средството споредено со последните годишни ревидирани финансиски извештаи)
На 31 март 2022 година, недвижностите и опремата бележат незначително намалување од 0,6% во однос на минатата година, што во основа се должи на пресметаната амортизација на направените вложувања.
Со 31.3.2022 година, извршена е редовна замена на застарената ИТ-опрема. Останати посериозни вложувања во позицијата недвижности и опрема не се појавуваат во текот на 2021 година.
