Аналитика
Во октомври, поранешниот американски претседател Доналд Трамп објави дека планира да основа револуционерна технолошка компанија. „Го создадов Truth Social… за да се спротивставам на тиранијата на големата технологија“, рече тој. „Живееме во свет каде талибанците имаат огромно присуство на Твитер, но вашиот омилен американски претседател е замолчен“.
Апликацијата беше лансирана на Денот на претседателите, 21 февруари, но шест недели подоцна е опфатена со проблеми. Листа на чекање од речиси 1,5 милиони заинтересирани, кои не можат да ја користат, донесува Би-Би-Си.
Бројот 1.419.631
Truth Social многу личи на Твитер, кој му забрани на Трамп да објавува на платформата откако толпа негови поддржувачи го нападна Капитол на 6 јануари 2021 година. Твитер тврдеше дека Доналд Трамп, со лажни тврдења дека претседателските избори биле „украдени“, поттикнал насилство. Два дена подоцна, Твитер му забрани на Трамп да ја користи апликацијата до крајот на животот.
Truth Social може да изгледа како Твитер, но не е достапен на телефони со Android, на веб-прелистувачи или, очигледно, на повеќето луѓе надвор од САД. „Тоа беше катастрофа“, рече Џошуа Такер, директор на Центарот за социјални медиуми и политика на Универзитетот Њујорк. И републикански сојузник на г-дин Трамп, кој не сакаше да биде идентификуван, рече: „Се чини дека никој не знае што се случува“.
На 21 февруари, Truth Social беше една од најсимнуваните апликации на App Store – но многумина што ја преземаа не можеа да ја користат. Се претпоставуваше дека овој проблем наскоро ќе биде решен и г-дин Трамп ќе почне да ги објавува своите „вистини“ во наредните денови – но ниту една од тие работи не се случи.
При мојот обид да се пријавам, оваа недела, бев ставен на 1.419.631 на листата на чекање, пишува репортерот на Би-Би-Си.
И, додека YouTube, TikTok, Instagram и Facebook се меѓу 10-те најсимнувани апликации, според Similar Web, Truth Social е надвор од топ 100. Корисниците кои ќе го најдат својот пат до неа, најчесто ја опишуваат апликацијата како „малку празна“, бидејќи многу големи гласови од американската десница досега се држеле настрана. Друга студија покажа дека преземањата се намалени за дури 95% и многумина се чувствуваат фрустрирани.
„Се регистрирав за Truth Social пред неколку недели и сè уште на листа на чекање“, рече еден корисник на Твитер во вторникот. „Додека навистина успеам да се логирам на Truth Social, Трамп повторно ќе стане претседател“, се пошегува друг.
Збунети експерти
Главниот извршен директор на Truth Social, Девин Нунес, рече дека нејзината цел е да биде „целосно оперативна“ до крајот на март. Но, зошто апликацијата има толку многу проблеми ги збуни експертите. Некои укажаа на партнерството на Truth Social со Rumble, платформа за споделување видео што изгледа малку како YouTube.
Популарен меѓу конзервативците и екстремната десница, Rumble требаше да обезбеди „критичен столб“ за инфраструктурата на локацијата. Но, ако Truth Social има проблеми со серверот, зошто е потребно толку долго да се поправи? „Треба да бидат потребни неколку дена за да се поправи, а не шест недели“, рече републикански извор близок до г-дин Трамп.
„Секогаш ќе има проблеми на почетокот – но во овој момент, би помислил дека ќе се реши. „Се чини дека никој не разбира зошто“, коментираат познавачите на технологиите на социјалните мрежи.
Трамп и вистината
Се вели дека г-дин Трамп е бесен, прашувајќи зошто повеќе луѓе не го користат Truth Social. Тој има околу 750.000 следбеници, но нема објавено „вистина“ повеќе од еден месец. „Можеби го задржуваат“, вели г-дин Такер. „Тоа е неговата последна шанса да го лансира – кога одеднаш Трамп ќе влезе и ќе почне да биде навистина активен на него, тоа ќе добие бучава.
Сепак, иако преполн со проблеми уште на самиот почеток, Truth Social сè уште може да им конкурира на конкурентите како што се Габ и Гетр. Самата појава на Доналд Трамп се уште има квалитет на ѕвезда и секоја апликација за „слободен говор“ би се потрудила за да го има на својата платформа. Но, во моментов, Truth Social стана малку засрамувачки. Платформата која треба да се спротивстави на “тешкашите“ од Силиконската долина, едвај успеа да застане на нозе.
