Аналитика
Порота на суд во Чикаго во првото граѓанско судење за двете фатални несреќи на Боинг 737 MAX вчера утврди дека гигантот за производство на авиони должи 28,45 милиони долари на семејството на жртва, млада жена со индиско потекло.
Случајот го вклучува семејството на Шика Гарг од Њу Делхи, која загина во несреќата на Етиопијан ерлајнс во март 2019 година, една од двете фатални несреќи на MAX во кои вкупно згаснаа 346 животи.
По околу два часа размислување, поротата во федералниот суд во Чикаго врати со награда што вклучуваше 10 милиони долари за тага, 10 милиони долари за болката и страдањето на Гарг и друга отштета.
„Со задоволство ја прифаќаме пресудата. Дојдовме тука за судење пред порота и таа е апсолутно прифатлива“, изјави за АФП вдовецот на Гарг, Соумја Батачарја.
Боинг изрази жалење за смртоносните несреќи. „Длабоко ни е жал за сите што ги загубија најблиските на летот 610 на Лајон ер и летот 302 на Етиопијан ерлајнс“, изјави портпаролот на Боинг. „Иако го решивме огромното мнозинство од овие барања преку спогодби, семејствата исто така имаат право да ги бараат своите права преку судски процеси за отштета, а ние го почитуваме нивното право да го сторат тоа.“
Адвокатите што го застапуваат Батачарја тврдеа дека тој треба да добие помеѓу 80 и 230 милиони долари, додека адвокатот на Боинг предложи 11,95 милиони долари.
Тужбите се однесуваат на летот од 10 март 2019 година што се урна шест минути по полетувањето од Адис Абеба за Најроби, при што загинаа сите 157 лица во авионот.
Случајот на Гарг беше првиот случај што отиде на суд откако Боинг постигна десетици други граѓански спогодби во случаи поднесени од членови на семејството од несреќата на Етиопијан ерлајнс и од несреќата на 737 MAX на Лајон ер во 2018 година.
Боинг ја прифати одговорноста за несреќата на Етиопијан ерлајнс и ја призна потребата да им плати отштета на семејството на Гарг. Но, судењето ја одмери сумата, при што адвокатот на Боинг го оспори сведочењето од тужител-сведок за степенот до кој Гарг страдал пред да почине.
За време на овој завршен збор, адвокатот на Боинг, Ден Веб, го нагласи каењето на компанијата, свртувајќи се кон Батачарја за да го изрази извинувањето на Боинг на суд. Веб, исто така, им рече на поротниците дека мора да одлучат за едно прашање: фер и разумен износ на штета.
Гарг беше консултантка за Програмата за развој на Обединетите нации и патуваше во Најроби на Собрание на ОН за животна средина. Таа се омажлаи три месеци претходно и планирала да патува со својот сопруг, кој го откажал летот во последен момент поради состанок.
ОТФРЛЕНА КРИВИЧНАТА ОДГОВОРНОСТ НА БОИНГ
Минатата недела, суд во Тексас одлучи дека Боинг нема да се соочи со обвинение за криминален заговор поради несреќите на два авиони 737 Max во кои загинаа 346 лица, по барање на американската влада за отфрлање на случајот.
Како дел од договорот за отфрлање на обвинението, американската воздухопловна компанија се согласи да плати или да инвестира дополнителни 1,1 милијарда долари во казни, надомест за семејствата на жртвите од несреќите и мерки за внатрешна безбедност и квалитет. Договорот му овозможува на Боинг да избере свој консултант за усогласеност, наместо да добие независен монитор.
Обвинителите рекоа дека Боинг ги измамил владините регулатори во врска со системот за контрола на летот кој подоцна беше вмешан во фаталните летови. Пресудата доаѓа по емотивното сослушување во септември во Форт Ворт, каде што роднините на некои од жртвите го повикаа американскиот окружен судија Рид О’Конор да го отфрли договорот и наместо тоа да назначи специјален обвинител.
