Аналитика
Угостителите, закупците на штандови и поединците кои ќе вршат времени активности во рамките на претпразничните и празничните прослави, не смеат да заборават на обврските за издавање фискални сметки и за усогласување со законските одредби. Од Управата за јавни приходи ги потсетуваат – „Данокот на додадена вредност не е Ваш – тој припаѓа на сите граѓани!“.
Инспекторите се на терен и ќе контролираат дали давателите на услугите ги почитуваат правилата.
„Управата за јавни приходи ги потсетува сите угостители кои организираат предновогодишни и новогодишни дневни или вечерни прослави и продаваат влезници (резервации) и/или ваучери, должни се да издадат фискална сметка при продажбата, согласно член 2 од Законот за регистрирање на готовински плаќања.
Оваа обврска, секако, се однесува и на сите останати угостители кои ќе остварат готовински промет за други угостителски услуги, и да го регистрираат преку одобрен фискален систем и да издаваат фискални сметки за крајните корисници на услугите“.
Исто така, преку соопштението од Управата напоменуваат и кои се обврските што ги носи ангажманот на музичари.
„Ги потсетуваме даночните обврзници – угостители кои ќе ангажираат музичари или естрадни уметници во наредниот период како физички лица, да склучат договори за извршување на повремени или привремени услуги и да го пријават и платат данокот преку системот на УЈП на https://e-ujp.ujp.gov.mk/“.
Воедно, се нагласува дека потрошувачите мора да бараат фискална сметка, а ако не ја добијат – да пријават во УЈП.
„Апелираме на видно место да истакнете Соопштение, каде што ќе ги информирате потрошувачите за нивната обврска да бараат фискални сметки!
Потрошувачите на добра, односно корисниците на услуги, при купување должни се: „Да побараат фискална сметка и да ја чуваат по напуштање на местото на прометот на доброто, заради контрола. Секој граѓанин има право и обврска да ги пријави недисциплинираните даночни обврзници кои не ги исполнуваат своите обврски и не издаваат фискални сметки”.
За сите кои ќе се обидат да ги заобиколат законските одредби, следуваат казни.
„Управата за јавни приходи врши контроли на терен на цела територија на државата. За угостителите кои нема да издаваат фискални сметки или нема да ги почитуваат законските обврски, ќе бидат преземени соодветни мерки и поведени прекршочни постапки согласно Законот за прекршоци, Законот за регистрирање на готовински плаќања (ЗРГП) и Закон за даночна постапка (ЗДП) и тоа преку издавање на прекршочен платен налог“.
Во соопштението се посочува и тоа што носи (не)плаќањето на казната.
„Доколку обврзниците ја платат глобата во рок од 8 дена, износот се преполовува, но доколку глобата не се плати во зададениот рок, УЈП поднесува барање до Комисијата за поведување на прекршочна постапка и изрекува забрана за вршење на дејност во траење од 15 дена, сѐ до моментот на плаќање на глобата и отстранувањето на неправилноста.
Во случај, даночните обврзници да не се усогласат со Законот за регистрирање на готовински плаќања, при повторна контрола УЈП има право веднаш да изрече забрана за вршење на дејност во траење од 30 дена“.
Фискалниот апарат е задолжителен и за закупците на штандови. За нив од УЈП препорачуваат:
„Стопанствениците регистрирани даночни обврзници кои закупиле штандови за продажба на пијалаци, храна и други производи на организиран простор за прослава за претстојните празници, имаат обврска да користат одобрен фискален апарат, во доволен број, и за секоја услуга, односно за секоја продажба да издаваат фискална сметка. Воедно, во книгата на дневни финансиски извештаи да го евидентираат остварениот промет за секоја фискална каса навремено, а најдоцна наредниот ден да го уплатат дневниот промет на трансакциска сметка кај носителот на платен промет“.
Правила има и за лицата кои празниците ги користат за времени дејности од кои може да се заработи.
„Испраќаме апел и до сите физички лица кои ќе вршат дејност од времен карактер, како дел од базари или новогодишни и божиќни настани на отворен или затворен простор, а сè уште се немаат усогласено со Законот за данок на личен доход (ЗДЛД), да поднесат Барање за паушално плаќање на данокот од вршење на дејност од времен карактер, во подрачната единица на УЈП каде што ја вршат дејноста, со цел да им се издаде решение со утврдени аконтации на данокот на личен доход и налози за плаќање на данокот за остарениот приход во периодот додека ја вршеле дејноста“.
УЈП апелира сите даночни обврзници да се придржуваат кон законските обврски и да бидaт одговорни даночни обврзници.
