Аналитика
Акциите на најголемата банкарска тројка, како и лидерот во фармацијата и најголемиот нафтен дистрибутер беа прв избор на „менито“ на инвеститорите во мај, како најинтересни за тргување – Македонска берза го објави месечниот статистички билтен.
Првото место, како по обичај, е резервирано за Комерцијална банка, а на втората позиција друштво и прави НЛБ Банка Скопје. „Алкалоид“, лидерот во фармацијата, во мај се најде на третата позиција, пред Стопанска банка Скопје, додека, пак, листата топ 5 најтргувани акции на официјалниот пазар ја заокружуваме со нашиот најголем нафтен дистрибутер „Макпетрол“ Скопје.
Акцијата на Комерцијална банка е на челната позиција како најтргувана на домашниот пазар на капитал.
Просечната цена што ја достигнала акцијата на најголемата македонска банка е 11.843,34 денари. Во текот на месецот биле истргувани 7.326 акции. Конкретно, со акциите на Комерцијална банка бил направен промет од 86.764.276 денари или 1.410.693 евра, а нејзиното учество во вкупниот берзански промет било 34,11 отсто.
Акцијата на НЛБ Банка минатиот месец имала просечна цена од 29.828,35 денари. Вкупниот промет постигнат со оваа акција изнесува 54.913.999 денари или 892.833 евра, што претставува учество од 21,59 отсто во вкупниот промет.
Третата најтргувана акција на официјалниот пазар на Берзата е на македонскиот фармацевтски гигант „Алкалоид“ АД Скопје. Се работи за истргувани 2.755 акции, по просечна цена од 17.973,61 денар. Вкупниот промет што во мај бил достигнат со акциите на „Алкалоид“ изнесувал 805.033 евра, односно 49.517.306 денари. Со тоа, во вкупниот промет има удел од 19,47 проценти, покажува билтенот на Берзата.
Во друштвото на компании кои котираат на Македонска берза, Стопанска банка Скопје се најде на четвртото место од листата на топ најтргувани акции. Просечната цена на оваа акција изнесуваше 1.284,84 денари, со која се реализра промет од 19.475.570 денари или 316.680 евра. Од аспект на вкупниот промет, тоа претставува учество од 7,66 проценти.
На петтата позиција на листата најтргувани акции е нашиот најголем нафтен дистрибутер „Макпетрол“ Скопје. Со просечна цена од 68.595,72 денари, вкупниот промет кој бил постигнат со оваа акција изнесува 12.621.613 денари или 205.242 евра. Тоа, пак, значи учество од 4,96 отсто во вкупниот промет.
Според податоците кои ги објави Македонската берза за периодот од први до 31 мај, вкупниот промет изнесувал 378.559.120 денари, односно 6,2 милиони евра и е намален за ↓61,26% во однос на претходниот месец.
Инаку, главниот берзански индекс МБИ10 паднал за ↓2,28%.
Кај брокерските куќи, највисоко на тронот во мај се искачи ИЛИРИКА ИНВЕСТМЕНТС АД Скопје, со остварен вкупен промет на Берзата од 262.169.355 денари. Комерцијална банка АД Скопје е на втората позиција со промет од 225.963.293 денари, додека на третото место, исто како и минатиот месец, е Еурохаус АД Скопје со вкупен промет од 72.761.121 денар.
Класичното тргување изнесувало 262.864.720 денари и е зголемено во однос на април за 5,78 проценти, кога изнесувало 248.497.849 денари.
Во класичното тргување истргувани се акции во вредност од 259.123.134 денари и обврзници во вредност од 3.741.586 денари.
Блок трансакциите во мај изнесувале 115.694.400 денари и се намалени за -84,12 отсто во однос на април.
Бројот на трансакции во мај бил 1.125 и е зголемен за 10,19 насто во однос на април, кога изнесувал 1.021.
Месечниот статистички билтен за мај 2023 година можете да го погледнете тука.
Редакција Пари
