Аналитика
Пожари кои брзо се шират во Грција оштетија домови и предизвикаа масовни евакуации, а властите велат дека „не можат да го контролираат“ пожарот.
Шумскиот пожар што избувна во среда попладне во крајбрежната област Вурвуру на Халкидики сега е под контрола, според локалните власти. Пожарот, кој предизвика сериозна загриженост кај жителите и посетителите, беше делумно локализиран до стемнување, благодарение на големите напори за гаснење на пожарите.
Како што објавија локалните власти, одговорот во гаснењето на пожарите беше брз и обемен. Над 140 пожарникари беа распоредени во областа, поддржани од седум копнени работни групи и 35 противпожарни возила. Воздушната поддршка вклучуваше 14 авиони и пет хеликоптери кои дејствуваа до 21:30 часот за да извршат фрлање вода над фронтот на пожарот.
За разлика од поволниот развој на настани на северот на Грција, пожарот на популарната туристичка дестинација Крит, кој избувна во среда попладне и брзо беше разгорен од силни ветрови, засега е надвор од контрола и покрај силните напори на обемниот тим на пожарникари, кои се обидуваат да го запрат и од копно и од воздух.
Домовите беа оштетени додека пламените јазици се ширеа низ шумите на ридовите, осветлувајќи го ноќното небо и испуштајќи облаци од пепел во воздухот.
Бурните ветрови ги насочија пламените кон југ низ фронтот што сега се протега на повеќе од 6 км, соопштија службите за итни случаи.
Според грчките медиуми, повеќе од 1.500 луѓе беа евакуирани од хотели и домови во среда, додека напорите за гаснење пожари се интензивираа. Неколку лица беа згрижени поради тешкотии со дишењето, соопштија официјални лица, но немаше непосредни извештаи за сериозни повреди.
Пожарникарите се бореа со пламените јазици со часови во текот на ноќта, но силните ветрови го отежнуваат гаснењето на пожарот.
Противпожарната служба соопшти дека 230 пожарникари, поддржани од 10 авиони за фрлање вода, се борат со пламените јазици, кои гореа низ шума и обработливо земјиште во областа Иерапетра на Крит, на јужниот брег на островот.
„Ситуацијата е многу тешка. Пожарот е многу тешко да се локализира. Во моментов не можат да го локализираат“, изјави Нектариос Пападакис, службеник за цивилна заштита во регионалните власти, за новинската агенција АП.
„Туристите кои беа преместени се добро. Тие се однесени во затворена кошаркарска арена и хотели во други региони на островот.“
Чадот стигнал до плажата Макри Јалос, на повеќе од 10 км од изворот на пожарот во Ахлија.
На три локации им е наредено евакуирање на јужниот брег на островот.
До жителите биле испратени локални известувања за евакуација преку мобилни телефони.
Пожарникарите биле повикани и на пожар на островот Китира и на друг во северниот регион Халкидики.
Жештината притиска и на Атика, каде што температурите се искачуваат до 35°C. Силните северни ветрови што достигнуваат до 7 бофори ја зголемуваат опасноста од пожари. „Мора да останеме во состојба на висока готовност за пожари и овде“, предупреди метеоролог.
Нема извештаи за сериозни повреди, но некои жители биле згрижени поради тешкотии со дишењето.
Сите болници на Крит се ставени во состојба на готовност како што се развива ситуацијата.
Пожарот се случува во услови на смртоносен топлотен бран низ Европа и по неколку пожари во шпанскиот регион Каталонија. Грција беше во состојба на висока готовност за пожари од крајот на минатата недела, а пожар веќе ги зафати крајбрежните градови Палеа Фокеа и Тимари во близина на Атина.
Грција и другите земји во Медитеранот се наоѓаат во област што научниците ја нарекуваат „жариште на шумски пожари“ – со пожари вообичаени за време на топлите и суви лета.
Властите велат дека овие станаа подеструктивни во последниве години поради брзо менувачката клима.
Повеќе од 50.000 луѓе беа евакуирани оваа недела поради шумски пожари во западната провинција Измир, додека Европа е во канџите на смртоносен топлотен бран.
(Фото: АФП)
