Аналитика
Зголемување на активата, натамошен раст и задржување на квалитетот на кредитното портфолио се приоритетите кои УНИБанка АД Скопје ги има зацртано во работниот план за годинава.
Без оглед на неможноста да се предвиди текот на домашните и на светските случувања, во Банката, врз база на претходното искуство, постои уверување дека ќе се постигне зголемен раст кај депозитите. Се подготвуваат нови депозитни продукти, а вниманието особено е насочено кон трансакциските сметки и нивните потенцијални корисници, преку оптимизирање на административните трошоци.
Банката ќе се стреми и кон зголемување на пазарното учество по различни сегменти во банкарскиот сектор зависно од преземениот ризик, како и кон влијанието на адекватноста на капиталот и профитабилноста. И натаму ќе се работи на подобрување на квалитетот на услугите, усовршување на дигиталните сервиси и каналите за плаќање.
Во преден план се и развојот на знаењето и вештините на вработените, од кои зависи остварувањето на бизнис планот, во чиј фокус се потребите и интересите на клиентите.
Во Банката сметаат дека сето тоа ќе се постигне. Притоа, се посочува дека во ланскиот план за работа не биле предвидени последиците од енергетската криза и ескалацијата на руско-украинскиот конфликт, но сепак, за нив 2022 била успешна година. Конкретно, нето кредитното портфолио забележало раст од 4,7 насто, а и прибраните средства од финансискиот сектор биле за 106,5 проценти поголеми во споредба со крајот на 2021 година. Освен тоа, се реализирала и планираната емисија на перпетуална обврзница во износ од 2,5 милиони евра, која придонела за дополнително зајакнување на капиталната позиција на банката.
