АНАЛИЗА: НА КОГО ПЕНЗИЈАТА МУ ПОРАСНА ЗА 4,000 ДЕНАРИ, А КОЈ ДОБИ САМО 700 ДЕНАРИ со септемвриското покачување?

Просечната пензија во септември со покачувањето се зголемила за 1,139 денари, односно од 16,376 денари колку што изнесуваше во август на 17,515 денари. Зголемувањето се должи на законските измени со кои од септември пензиите пораснаа за 6,8 проценти. Сепак, кој најмногу го почувствува бенефитот од зголемувањето на пензиите?

НАЈВИСОКИТЕ ПЕНЗИИ ДОБИЈА НАЈМНОГУ, НАЈНИСКИТЕ НАЈМАЛКУ

Највисоката пензија во државава со септемвриското покачување сега изнесува 64,392 денари. Во август пред зголемувањето на пензиите таа изнесувала 60,294 денари. Тоа пак значи дека корисниците на оваа пензија, а ги има 72-ца во земјава (69 се по основ старосна пензија, 3-ца е семејна пензија) во септември добиле зголемување од 4,098 денари.

Вкупно 215 пензионери со покачувањето на пензиите сега примаат пензии над 60,000 денари. Највисоката како што наведовме погоре е 64,392 денари, следуваат 63,732 денари (овие пензионери добиле покачување од 4,058 денари, а ги има 66) и 60,432 денари која ја примаат 77 пензионери.

Со зголемувањето на пензиите се поместила и границата кај максималните пензии. Во август максималните пензии почнувале од 41,724 денари до 60,294 денари. Од септември најниската од максималните пензии изнесувала 44,561 денар до 64,394 денари. Во септември бројот на пензионери кои примаат максимална пензија изнесувал 1,379.

ЗГОЛЕМУВАЊЕ КАЈ МАКСИМАЛНИТЕ ПЕНЗИИ

*во денари

НАЈНИСКАТА ПЕНЗИЈА СЕ ЗГОЛЕМИЛА ЗА 700 ДЕНАРИ

Колку добија, пак, најсиромашните пензионери чии пензии се вбројуваат во групата минимални пензии? Најниската пензија, според статистиката на Фондот за пензиско и инвалидско осигурување во август месец пред зголемувањето била 10,276 денари. Во септември примателите на оваа пензија на сметка добиле 10,975 денари или зголемувањето изнесува 699 денари. Во земјава бројот на овие пензионери со најниска пензија изнесува 2,921.

Највисоката пензија во групата на минимални пензии во август била 13,172 денари, а во септември пораснала на 14,068 денари што пак е зголемување за 896 денари. Колку се офајдиле останатите?

Бројот на пензионери со минимални пензии во септември месец изнесувал 82,595 или секој четврти пензионер во земјава зема минимална пензија.

ЗГОЛЕМУВАЊЕ КАЈ МИНИМАЛНИТЕ ПЕНЗИИ

*во денари

Со септемвриската пензија околу 330 илјади пензионери во државата добија повисоки пензии за 6.8%, согласно новата методологија воведена со последните измени во Законот за пензиското и инвалидското осигурување, кои стапија на сила во март 2022 година.

Новата Методологија предвидува усогласување на пензиите со комбиниран модел од 50% пораст на просечната плата на сите вработени во државата и 50% пораст на трошоци на живот, согласно официјалните податоци на Државниот завод за статистика.

Усогласувањето ќе се врши два пати во годината, односно во март и септември, што значи ќе ги следи промените во двата индекси за усогласување.

Во септември месец се зголемил и бројот на пензионери во државата. Статистиката регистрирала 333,322 пензионери во септември месец, за разлика од август кога во државата се изброени 330,640 пензионери. Во септември месец имало 2,609 нови пензионери, а починале 1,132.

Редакција Пари

Преземањето на авторски содржини (текстови и фотографии) од оваа страница е дозволено само делумно и важат условите опишани на следниот линк.